Kush është pa mëkate le të lëshojë gurin e parë kundër mësueses.
Unë nuk e njoh mësuesen nga Kamza, por me sa kuptoj duket që është njohëse e mirë e lëndës, dhe përveç kësaj nuk e pashë dhunën si një shfryrje të inateve apo streseve të saj, siç po lexoj që po gjykohet në rrjet.
Mendoj se mësuesja ka gjykuar se qëllimi e justifikon mjetin. Ajo mund të jetë e apasionuar dhe kërkuese për lëndën e saj, madje mund të jetë njeri zemërmirë, por është padashur viktimë e një pedagogjie të gabuar.
Premisë që dhuna është gjithmonë e papranueshme, qoftë psikologjike apo fizike. Por unë pashë një mësuese të përkushtuar që përdor çdo mjet që ajo e mendon të arsyeshëm në dobi të të nxënit.
Kush i përket brezave që kanë bërë të paktën shkollën fillore në kohën e diktaturës, e mban mend sesi këto mënyra/metoda ishin efikase dhe madje prindërit tanë shpesh i thoshin mësueses “të lumtë dora” apo “çja bëre mirë”.
Edhe kjo mësuese, nisur nga mosha prezumoj që i përket asaj rryme pedagogjike, ku dhunën verbale e shikon si mjet didaktik për të përçuar dijen. Mos harrojmë se filozofia e edukimit lindor e shikon mësuesin si prind të dytë, çka e bën mësuesin të ndihet në pozitat e atij që heq veshin, çka pedagogjik perëndimore e përjashton kategorikisht.
Ju siguroj që ky nuk është rast i izoluar, ka plot të tillë dhe problemi është një dhe i vetëm:
– mësuesit nuk trajnohen periodikisht në institucionet që duhet, aty ku teoria dhe përditësimet shkencore janë gjithmonë të freskëta, pra në Fakultetet e Edukimit, por trajnohen (ose më saktë blejnë çertifikatën e trajnimit) pranë shoqatave (jo) fitimprurëse që liçensohen e zëvendësojnë akademikët e Shkencave të Edukimit, me trajnerë që shpesh herë vijnë nga administrata publike.
Kjo zonjë, kjo mësuese, jam i bindur që nuk ka marrë trajnimet e nevojshme pranë ndonjë universiteti publik, por për nevoja të plotësimit të kreditëve të dosjes, diku do jetë trajnuar, por jo aty ku duhet.
Nëse mësuesit nuk trajnohen ashtu siç duhet, nga institucionet që duhet, nga pedogogjistët që duhet, dhe me metodat bashkëkohore që duhet, ne vazhdimisht do kemi mësues që institucionalizohen, dhe që shpikin metoda personale (që shpesh herë japin rezultate) por që s’kanë asnjë lidhje me pedagogjinë dhe shkencat e edukimit.
Sot hoqëm nga sistemi një mësuese, që po të kishim ditur ta trajnonim, ajo do ishte më rezultative dhe ne s’do kishim nevojë të bënim moral mësuesisë dhe sistemit të edukimit.
Ps. Sikur të ndiqej ky standard kur dalin video edhe për ata që vjedhin, mbase këtë fundjavë do ikja në Korçë!
