Fjala e Ajet Ramçaj, Kryetar i Grupimit “Dhjetor ’90”, në protestën pranë banesës së Ish-kryeministrit Sali Berisha ( Rruga e Rezistencës)
Të nderuar qëndrestarë!
Sot asht dita e 25-të që mblidhemi këtu.
Të gjithë ata që kanë marrë pjesë qoftë edhe njëherë të vetme janë Luftetarë të Lirisë dhe të Vërtetës.
Para 33 vitesh, ne u ngritëm për të përmbysur një Regjim, kauzë që filloi me Lëvizjen Studentore, e cila u kthye shpejt në Lëvizje Popullore.
Sot, në këtë godinë ndodhen në arrest shtëpie dy prej nesh dhe jo në emër të Ligjit, por të Ramë, Spak-Maliqit.
Ne e dimë prej kohësh se ata që kujtuam se i përmbysëm nga pushteti antipopullor e antishqiptar në 1992 nuk do na e falnin kurrë.
Arresti i Sali Berishës dhe Jamarbër Malltezit asht një Këmbanë Ogurzezë që bie për çdo shqiptar.
Kush e do Lirinë, Demokracinë, të Vërtetën dhe ka dy gram mend, duhet të ndihet sot i arrestuar.
Unë nuk jam sot këtu e nuk kam kenë asnjë ditë për Sali Berishën e Jamarbër Malltezin.
Ata nuk kanë nevojë që t’i mbrojmë Ne.
Kam dalë e do dalë këtu për Lirinë e Demokracinë që sot asht në gjendje KOME në Shqipni falë të gjithave pushteteve që tash 11 vite i kanë grumbullu në dorën e tyne pinjollët e ish-Regjimit Komunist.
Sot vërtetë jemi të vonuar me ket Lëvizje Shprese edhe për arsye të gabimeve të bëra gjatë rrugës tonë 33 vjeçare të qëndresës, por ama kurrë nuk asht vonë me luftu për Liri e Dinjitet.
Ne, Studentëve të Dhjetorit 90, prindërit e gjyshërit na lanë trashëgim një Shqipëri në pikë të hallit.
Ne sot duhet të bajmë gjithçka që mos t”u lamë trashëgim fëmijëve e nipërve një Shqipni vaj-medet.
Faleminderit.
