Keqtrajtimi dhe diskriminimi i mësueseve është rregulli numër një në drejtimin e shkollave gjatë këtyre viteve, por rasti i mësueses M.D. është më i stërholluari – është manual për nga mënyra e presionit, dhunës, përjashtimit, shantazhit që i janë ushtruar ndër vite.
Dhe burimi është kërkesa e mësueses për përshtatje të orarit të mësimit, për shkak të rrethanave të veçanta në të cilat gjendej si kryefamiljare dhe prind me fëmijë me aftësi ndryshe, gjë që është parashikuar në akte ligjore. Por, edhe sikur të mos ishin parashikuar, zonja drejtoreshë B.Ç. do duhej t’i zbatonte ato, për të krijuar klimë të normale pune; ia kërkonte detyra që mbante, sepse ka norma e rregulla të cilat jetojnë me ne e s’duhet t’i lexojmë që t t’i praktikojmë. Këtu filloi kalvari i keqtrajtimit të mësueses, skemat e njohura të kundërvënies së kolegëve dhe diskriminimit të saj për t’i shkuar për shtat humorit të drejtoreshës, mbledhje për masa disiplinore duke mos respektuar asnjë bazë ligjore.
Shantazhi u stërhollua dhe perfeksionua kur ish drejtoresha e shkollës mblodhi Këshillin e Etikës dhe Komisionin e Disiplinës – të përbërë nga koleget shoqe e psikologe dhe pa fakte i japin vërejtje dhe paralajmërim për pushim nga puna mësueses, ndërsa gjithë stafi pedagogjik me ndonjë përjashtim të rrallë, nuk i flasin koleges, sepse drejtoresha e shpalli publikisht armike.
Është e njëjta situarë e luftës së klasave të viteve totalitare që përsëritet në skena teatrore veçimi e diskriminimi pa asnjë motiv real. Skema zgjerohet me përfshirjen e aktorëve të tjerë në lojë, të cilët edhe këta i shkojnë për shtat drejtoreshës për ushtrim presioni e shantazhi ndaj mësueses. Nuk ka asnjë mundësi teorike dhe praktike që persona të ndryshëm të shkruajnë të njëjtin tekst ankese, si nuk ka mundësi tjetër përpos se manipulimi dhe përdorja e tyre.
E goditur psikologjikisht, qëllimshëm, mësuesja i drejtohet Komisionerit për mbrojtjen nga diskriminimi për gjithë keqtrajtimin e përshkallëzuar, i cili u shpreh se bazuar ne aktet e administruara rezulton se ankesa si dhe në vijim procesi i shqyrtimit i zhvilluar nga Komisioni i Etikës dhe i Disiplinës së shkollës nuk shoqërohet me fakte dhe prova në lidhje me shkeljet e pretenduara nga ana e drejtoreshës B.Ç.
Komisioneri për mbrojtjen nga diskriminimi arriti në përfundimin se bazuar në fakte, rrethanat dhe provat e administruara, ankuesja M.D. i është nënshtruar një trajtimi të padrejtë dhe të disfavorshëm në kuadër të procedimit disiplinor të zhvilluar nga Komisioni i Etikës së shkollës.
Po s’kemi të bëjmë me happy end: ish drejtoresha B.Ç. për të mbyllur këtë histori turpi – që vetë kishte krijuar – u largua si drejtuese e shkollës, por keqtrajtimi dhe diskriminimi i mësueses dhe bullizimi i fëmijës së saj vijojnë me porosi të veçantë.
U ngrit edhe një emision televiziv, për ta bërë publike antihistorinë, të cilin e ndoqa, siç e kam ndjekur prej fillese këtë rast e me keqardhje vërejta se si mund të lexohet një vendim ashtu siç nuk është shkruar, duke më shtënë në mend se porosia vijon për përkryerjen e Manualit të diskriminimit të mësueses.
