Është shtyrë seanca paraprake në GJKKO ndaj kryetarit të PD, Sali Berisha, dhëndrit të tij Jamarbër Malltezi, biznesmeni Fatmir Bektashi, Xhimi Begeja dhe financierja Andia Pustina.
Gjykata e Posaçme ka shkelur afatet për njoftimin e seancës paraprake dhe për këtë arsye u shty edhe seanca e sotme.
Avokati Genci Gjokutaj deklaroi se, seanca është shtyrë për në datën 25 nëntor, edhe për shkak të volumit të madh të dosjes.
Gjokutaj u shpreh se seanca paraprake është caktuar para 10 ditëshit që mbrojtja ka në dispozicion për të shqyrtuar aktet.
“Seanca është caktuar para ditëshit, por janë 160 mijë faqe. Pjesa e leximit, s’duhet vetëm të lexohen por edhe të selektohen kush janë të dobishme për çështjen.
Çështja nuk ka as dyshimin më të vogël të arsyeshëm, do të kërkojmë pushimin e çështjes, pastaj vendimmarrja është e gjykatës”, tha avokati Gjokutaj.
Në seancën paraprake, gjyqtare e së cilës është Flojera Davidhi, vendoset nëse çështja do të shkojë për gjykim, dosja do të kthehet pas ose do të pushohet çështja.
