Sekretarja për Marrëdhëniet me Publikun në PD, Jola Hysaj ka njoftuar dje dorëheqjen nga të gjitha pozicionet që ka mbajtur në Partinë Demokratike.
Nëpërmjet një statusi në rrjetet sociale, ajo ka paraqitur disa nga vërejtjet e saj për problematikat brenda PD.
Kreu i PD-së, Sali Berisha ka zbuluar detaje nga dorëheqja e saj, ku tha se Hysaj ia ka komunikuar me mesazh dhe ai e ka falenderuar për kontributin e dhënë në këtë forcë politike.
“Jola Hysaj më ka dërguar dje një mesazh në të cilin më falënderon për bashkëpunimin, por më njofton se ka vendosur të japë dorëheqjen. Dhe unë e falënderoj për kontributin që ka bërë dhe respektoj plotësisht vendimin e saj.
Dorëheqjet janë një akt normal në një parti demokratike dhe në një shoqëri të lirë.
Në këtë rast ajo dha kontributin e saj, nuk mund t’i mohohet.
Por nga ana tjetër ajo arriti në përfundimin se duhet të ndërpresë aktivitetin e saj politik për arsye të saj dhe kjo është një zgjidhje që ka bërë dhe unë ia respektoj”, tha Berisha.
