Një automjet ka rënë në rrjedhën e një përroi rreth orës 01:00 të natës në vendin e quajtur Ura e Halilit, fshati Dars, në Bashkinë Klos.
Sipas njoftimit zyrtar, mësohet se është arrestuar 24 vjeçari, Andi Llosha, drejtuesi i automjetit.
Mësohet se në automjet ndodhej edhe një person tjetër, i identifikuar si Jurgen Karaj 30 vjeç, për të cilin mendohet se e ka marrë rrjedha e ujit.
Rrethanat në të cilat mjeti ka përfunduar në përrua mbeten ende të paqarta.
Shërbimet e Policisë, polumbarët e RENEA-s dhe banorë të zonës vijojnë kërkimet për gjetjen e pasagjerit, që dyshohet se e ka marrë rrjedha e përroit.
“Rreth orës 01:30, është marrë informacion se në vendin e quajtur ura e fshatit Dars, njësia administrative Klos, një mjet tip “Audi”, me targa angleze, ka dalë nga rruga dhe ka rënë në përroin e fshatit Dars.
Menjëherë në vendngjarje kanë shkuar shërbimet e Policisë dhe shërbimi zjarrfikës.
Nga veprimet e shpejta të kryera nga shërbimet e Policisë u bë i mundur identifikimi i drejtuesit të mjetit, shtetasit A. L., 24 vjeç, banues në fshatin Fullqet, Klos.
Po nga veprimet dyshohet se në automjet ka qenë edhe një pasagjer, shtetasi J. K., 30 vjeç, banues në fshatin Fullqet, të cilin dyshohet se e ka marrë rrjedha e përroit.
Gjatë veprimeve për zbardhjen e rrethanave të aksidentit, shërbimet e Policisë kapën dhe arrestuan shtetasin A. L., 24 vjeç, i cili dyshohet se pas shkaktimit të aksidentit është larguar nga vendngjarja.
Ky shtetas iu nënshtrua testit të alkoolit, nga i cili rezultoi se e drejtonte mjetin në gjendje të dehur.
Ndërkohë, polumbarët e RENEA-s, shërbimet e Policisë dhe zjarrfikësit vijojnë kërkimet në përroin e fshatit Dars për gjetjen e pasagjerit, shtetasit J. K.
Materialet procedurale iu referuan Prokurorisë për veprime të mëtejshme”, njoftohet në komunikatën zyrtare të policisë së shtetit.
