Asnjë masë për uljen e çmimeve.
Në një kohë kur çmimet mbeten shqetësim për konsumatorët, kryeministri Edi Rama prezantoi platformën e re “Pasqyra e Çmimeve”, që synon t’u mundësojë qytetarëve të krahasojnë çmimet mes supermarketeve.
Rama kërkoi që marketet të raportojnë çmimin final me TVSH, çmimet promocionale dhe të dhënat për produktet në stok, duke theksuar: “Askush nuk po thotë që do përcaktojmë çmimet”.
Nisma e qeverisë fokusohet kështu te transparenca dhe orientimi i konsumatorit, ndërsa nuk u prezantua në këtë takim ndonjë masë konkrete për uljen e drejtpërdrejtë të çmimeve.
Edi Rama: Të angazhohemi bashkarisht, jo në parim, por konkretisht! Ju të formoni rrjetin e pikave tuaja të shitjes, për të marrë pjesë në një fazë të parë pilot dhe të niset transmetimi i të dhënave. Të dorëzohet lista e produkteve që përputhen me kategoritë e kësaj faze, me bar cod, me njësi matëse. Kështu, produket të jenë të krahasueshme.
Të ekspozohet lista e plotë e të gjitha dyqaneve dhe adresave. Platforma të marrë çmimin real final për konsumatorin, me TVSH, dhe të dallojë qartë çmimin normal.
Të përcaktohet një standard se sa shpejt ndryshojnë çmimet dhe të përcaktohet nëse platforma të tregojë edhe kur produkti nuk do të jetë në stok. Për qytetarin, ka ardhur koha të jetë shumë e thjeshtë, të shikojë, të krahasojë dhe të zgjedhë.
Jo të jetë në errësirë dhe të përballet me çfarë i nxjerr rruga dhe të mos ketë një pasqyrë konkurrence. Do ju lutesha të binim dakord për këto gjëra, askush nuk po thotë që do përcaktojmë çmimet apo se ju nuk do nxirrni fitime, por ka ardhur momenti ta shikojmë njëri-tjetrin në sy.
