SPAK del me njoftim, arratisen biznesmenët Ergys Agasi dhe Ermal Beqiraj! Ekzekutohet masa për Karçanajn dhe të tjerët
Prokuroria e Posaçme Kundër Korrupsionit dhe Krimit të Organizuar (SPAK) ka dalë me një njoftim zyrtar lidhur me një procedim penal, ku janë përfshirë tetë shtetas të dyshuar për vepra të rënda penale të kryera në kuadër të një grupi të strukturuar kriminal.
Sipas SPAK, është regjistruar procedimi penal nr. 20/1 i vitit 2025 për veprat penale: “Konkurrencë e paligjshme nëpërmjet dhunës”, “Heqje e paligjshme e lirisë”, “Shkelje e barazisë së pjesëmarrësve në tendera apo ankande publike”, “Grup i strukturuar kriminal”.
Kujtojmë se ditën e djeshme, data 15 dhjetor SPAK paraqiti kërkesën në Gjykatën e Posaçme për caktimin e masave të sigurimit ndaj tetë personave.
Ndërsa sot, më 16 dhjetor 2025, hetuesit e Byrosë Kombëtare të Hetimit (BKH) kanë ekzekutuar disa prej këtyre masave.
Gjykata ka caktuar masën “Arrest në burg” për biznesmenët Ergys Agasi dhe Ermal Beqiraj, por këto masa nuk janë ekzekutuar, pasi të dy rezultojnë të arratisur.
Ndërkohë, është ekzekutuar masa “Arrest në shtëpi” për drejtoreshen e AKSHI Mirlinda Karçanaj, si edhe për shtetasen H.D.. Për shtetasin E.I. është vendosur masa pezullim nga detyra dhe ndalim i daljes jashtë shtetit, ndërsa për shtetasit A.P., G.H. dhe R.Rr. është caktuar masa ndalim i daljes jashtë shtetit.
