Kryeministri Kurti jep lajmin e mirë: Rrit pensionet në 150 euro dhe shtesat për nënat me fëmijë deri në 50%

Kryeministri i Kosovës, Albin Kurti, ka njoftuar se nga muaji nëntor do të rriten pensionet dhe shtesat për nënat me fëmijë. Ai bëri me dije se ky vendim hyn në fuqi nesër.
Në mbledhjen e Qeverisë, Kurti tha se rritja për pensionistët do të jetë nga 120 euro në 150, teksa për nënat shtesat do të rriten për 50 përqind.
Vendimi për pensionet, Kurti tha se prek rreth 200 mijë pensionistë.
“Ashtu siç ju kam premtuar, sot ka lajme të mira edhe për pensionistët sepse pensioni minimal nga 120 euro do të bëhet 150 euro, duke filluar nga muaji nëntor, që fillon nesër. Kjo rritje prek rreth 200 mijë pensionistë në kategoritë e pensioneve”, deklaroi Kurti.
Ai shpjegoi edhe rritjen për fëmijët 0-16 vjet.
“Kam premtuar se do të ketë lajm të mirë edhe për nënat që marrin shtesa për fëmijë. Nga muaji nëntor, shtesat për të gjithë fëmijët nga 0-16 vjet e që janë rreth 400 mijë, do të rriten për 50 përqind. Një nënë me dy fëmijë që këtë muaj ka marrë 40 euro, nga muaji i ardhshëm do t’i marr 60 euro. Sikurse çdo herë, shumë lajme të mira për të gjithë”, tha Kurti.