Njoftimi bëhet nga faqja zyrtare e Presidentit të Republikës Bajram Begaj
Thirra sot mbledhjen e Këshillit të Sigurimit Kombëtar si detyrim kushtetues me synim analizimin e gjendjes së sigurisë kombëtare dhe analizimin e prioriteteve të sigurisë kombëtare për vitin 2023, shkruhet në njoftim.
Ja njoftimi i plotë:
Thirra sot mbledhjen e Këshillit të Sigurimit Kombëtar si detyrim kushtetues me synim analizimin e gjendjes së sigurisë kombëtare dhe analizimin e prioriteteve të sigurisë kombëtare për vitin 2023.
U ndala në fjalën time në kërcënimet ndaj sigurisë në nivel kombëtar, rajonal dhe atë global.
E vlerësova si shumë të rëndësishëm këtë takim dhe angazhimin e të gjitha institucioneve për garantimin e sigurisë kombëtare në fushën e tyre të përgjegjësisë. Theksova si të domosdoshëm bashkërendimin, përpjekjet dhe sigurimin e gjithpërfshirjes institucionale, përdorimit efikas të burimeve kombëtare dhe kërkimit të kontributit të çdo qytetari në funksion të sigurisë kombëtare.
Kërkova gjithashtu që të trajtohet me prioritet hierarkia e dokumentacionit strategjik si procesi i rishikimit dhe hartimit të dokumentave strategjikë, Strategjisë së Sigurisë Kombëtare, Strategjisë Kombëtare të Sigurisë Kibernetike, dokumentave strategjike në fushën e mbrojtjes dhe sigurisë, emergjencave civile, si dhe strategjive sektoriale.
Këto dokumenta nuk duhet të jenë thjesht dokumenta formalë, por duhet të jenë të mirëbuxhetuara dhe të sigurojnë përdorimin në mënyrë të koordinuar dhe harmonizuar të instrumentave të fuqisë kombëtare në garantimin e sigurisë, të nxisin zhvillimin e qëndrueshëm ekonomik, të rrisin mirëqënien e qytetarëve, dhe të sigurojnë mbrojtjen e vlerave dhe interesave kombëtare të Republikës së Shqipërisë.
