Liga e Kampioneve ka luajtur të martën në mbrëmje ndeshjet e 3-ta në grupet A, B, C dhe D.
Në takimin e vlefshëm për grupin C, të luajtur më herët në Gjermani, Bajerni i Mynihut ka mposhtur thellë, 5-0, Viktorian e Plzenjit.
Lëroi Sane ka shënuar një dygolësh, ndërsa golat e tjerë u realizuan nga Gnabri, Mane dhe Shupo-Moting.
Bavarezët kryesojnë renditjen me pikë të plota, 9 ndërsa në takimin tjetër të grupit, Interi ka shtangur Barcelonën, duke e mundur 1-0.
Në “San Siro”, zikaltërit e Simone Inzagit luajtën një ndeshje kompakte të përbërë nga kundërsulmet, duke gjetur rrugën e rrjetës në rikuperimin e pjesës së parë me Calhanoglu. Në pjesën e dytë, reagimi i Xavi ndaj Barcelonës çoi në shtyllën e Dembélé dhe një gol të anulluar të Pedri.
Sa u përket grupeve të tjera, në grupin A, Napoli mposhti thellë, 6-1, Ajaksin, në ndeshjen e luajtur në Holandë, duke korrur fitoren e 3-të radhazi, kurse Liverpuli fitoi 2-0 në derbin britanik me Gllasgou Rejnxhërs. Për skuadrën e trajnerit Klop, kjo ishte fitorja e dytë në grup.
Në grupin B, Klub Bryzhi vazhdon të jetë e papritura e këndshme, teksa ka korrur fitoren e 3-të në po aq ndeshje, duke mposhtur 2-0 Atletikon e Madridit, kurse Porto ka mundur 2-0 në fushën e saj Bajer Leverkusenin.
Dhe, së fundi, në grupin D, në takimin e luajtur më herët, Olimpiku i Marsejës ka mposhtur thellë, 4-1, Sportingun e Lisbonës, ndonëse ishin portugezët që kaluan të parët në epërsi brenda minutës së parë. Në takimin tjetër, të luajtur më vonë, Eintrahti i Frankfurtit dhe Totenhemi janë ndarë me rrjeta të paprekura.
