Është ora 8 e 20 minuta.
E hënë.
Parantezë…
Para zyrave kryesore të bregdetit Jonian, nxin një makinë funerali dhe kjo nuk është objekt i shkrimit.
Dikush vdes, disa lindin ose do ta uroja këtë raport lindje-vdekje, sepse këtu as po lindin më…
Në zyrën më të madhe Joniane ka hyrë ai, kryetari në ikje, që veç njerëzve, duket se e shiti edhe partia e tij. Punë pazaresh të prishura për tenderin e plehrave…
Tek tuk ka hyrë edhe ndonjë zyrtar që ka prishur relatat me kryetarin.
Të tjerët, janë ca në gjumë, ca në kafe.
E vështirë të vish në punë të hënën kur ke bërë plazh dy ditët e fundjavës.
Tani edhe njerëzit e kanë mësuar. Në Bashki nuk vihet herët se nuk gjen kënd. E vetmja zyrë në punë është binomi Aleat (që e nis punën në 8 e 30 por meqë është e hënë ka ardhur më herët) dhe Gjendja civile.
Jashtë bashkisë, ballinë e zezë.
Ta ketë shkruar vallë kryetari në ikje fatin e tij ? Thonë se njeriu e ndjen edhe vdekjen (politike në këtë rast) dhe e pregatit mortin e tij që në këtë rast sduket i largët, njëjtë si ballina e bashkisë që i plaset në fytyrë sapo i hedh sytë godinës në ato ditë që ditëziu shkon në zyrë anipse bindje absolute e kam se kujt mbi tokë nga Palasa në Nivicë dhe deri në Bolenë s’do t’i vijë keq për të, në çastin, kur të iki.
Tani njerëzit janë mësuar me huqe e vese. Nën zë të gjithë thonë “është shpejtë akoma për këta të zyrave…”
Jashtë është dikush, që pret nën panikun e vonesës së një drejtori. E mjerë. A ngacmohet drejtori kur është në kafe ? Më tej, një e dytë shfryn “hë se do më vijë prapë për vota. Po nuk e shkreha me gurë, qofsha e ligë…” Kushedi çka pritur prej të paudhëve…
Dikur ja beh një komunist nga ata që i qan hallet tek partia. “Hëhëëë, ky nuk kandidon më. Po nëse kandidon, unë do bëj fushatë si kamikaz kundër tij. Gjiknuri më ka thënë se nuk e kandidojnë më…”
Unë me vete në çast “ky vetëm po kandidoi nga burgu, po halli është se partia juaj i ka të gjithë si ky…”
Më tej një e moshuar thotë “edhe Krishtin po e solle të punojë me këta, e bëjnë hajdut si vetja”.
Thonë se njeriu e urren të ngjashmin, dhe dukshëm Rama e Gjiknuri bezdisen nga dikush që vjedh si ata, por pa ndarë me ta pjesën që duhet sidomos për oligarkun bankomat të tyre, Gjikurinë e tenderave.
Ku ju pihen kafet nuk e dimë.
Ajo që dimë është se koha e tyre ka dhënë alarmin SOS dhe si ajo varka në mbytje në mes të detit, ashtu edhe këtë Bashki nuk e shpëton dot kush.
Një shkëndijë shprese e shoh… Joni është aty !
