#Refleksion.
Të qënit i drejtë, kultivohet heret, shumë heret. Është edukim, përjetim, shëmbëllim, qëndrim, besim, sjellje prindërore e histori familjare. Por, sensi i drejtësisë kultivohet edhe nga padrejtësitë që ke provuar e përjetuar gjatë jetës ti e familja.
Drejtësia si koncept, por edhe si nevojë jetike, mbetet thjeshtë një fjalë e bukur që vret, nëse nuk ka njerëz për ta dhënë. E për ta dhënë drejtësinë nuk mjaftojnë diplomat, doktoraturat e titujt e fituar me mik, me politikë e parà, as me prindin deputet, ministër a boss. Drejtësinë e bëjnë njerëz që e kanë dashur e marr shkollën pa kopje. Drejtësinë e japin ata që nuk pretëndojnë gjëra që nuk i meritojnë e që nuk janë të zott ti bëjnë.
Drejtësia duhet tu besohet njerëzve të njohur si të drejtë e të ndershëm.
Është e rëndësishme të kuptohet se, të vendosësh të ndjekësh rrugën e drejtësidhënjes, mbi të gjitha duhet të jesh njeri me ndërgjegje të pastër dhe me moral të naltë. Sepse “Drejtësia e parë është ndërgjegjja”- thotë Hygoi.
E kjo varet nga ajo çfarë ti ke qëllim në jetë, të shërbesh apo të pasurohesh.
Nëse e kërkon drejtësidhënjen si mënyrë për tu pasuruar, është mirë të merresh me punë të tjera, sepse pasurimi nëpërmjet drejtësisë të demaskohen shpejt. Sepse nuk i shpëton dot syrit e veshit të njerëzve, sado hajdut i sofistikuar të jeshë.
Drejtësia, përpos shkollimit me meritën tënde, kërkon njerëz të pastër në shpirtë. Por, një i shkolluar pa meritë, një i punësuar pa meritë, është formuar për të fituar padrejtësisht. Kështu e trajton edhe drejtësinë.
Nëse je i etur për drejtësi, do të thotë se ke provuar në kurriz padrejtësinë. Por, kur je rritur e edukuar në familje me favore të pamerituara, privilegje e përfitime, kuptohet se ke të instaluar në karakterin dhe formimin tënd padrejtësinë.
Rekrutimi pra, është një element thelbësor në bërjen e një drejtësie të pavarur dhe të besueshme.
Mekanizmi që përdoret sot në përgatitjen e kontigjenteve për gjyqtarë e prokurorë, nëpërmjet Shkollës së Magjistraturës, është i dyshimtë, sepse i tillë është konkurimi. Fillimisht, kur nuk kishin filluar hilet e poshtërsitë, e kjo duket në dy-tre kontigjentet e para, dolën gjyqtarë e prokurorë exelentë dhe me personalitet njerzor mbi të gjitha. Pjesa më e madhe e tyre sot janë larguar nga sistemi, më shumë si të padëshiruar të Rama-Xhafajt, se për probleme me pastërtinë e figurës.
Rekrutimet politike, nepotike, krahinore e financiare e kanë ulur dukshëm nivelin e përgatitjes profesionale, se besueshmëria afërmendsh se më kso kriteresh, bie.
Po mbjelle egjër nuk ke si me korr grurë.
Trajtimi i kësaj teme është vërtetë e gjerë dhe komplekse. Por i hodha këto mendime ashtu si më erdhën, pa pas droje se dikujt i sakëlldiset, tuj mendu veten e tij, se bash atë dua dhe unë, të mos e konsiderojnë veten të paatakueshëm.
Një herë tjetër do flas për reformën dhe reformën e reformës së reformrrënuesit Xhafaj.
16.10.2024.
