Kanë hyrë në fuqi ndryshimet e reja në Kodin Rrugor, të cilat sjellin masa më të rrepta për drejtuesit e mjeteve që shkelin rregullat e qarkullimit.
Ndryshimet, të miratuara nga Kuvendi më 18 qershor dhe të publikuara në Fletoren Zyrtare më 22 korrik, synojnë forcimin e masave për sigurinë rrugore përmes ndëshkimeve më të ashpra.
Një nga ndryshimet kryesore lidhet me drejtimin e automjetit nën efektin e alkoolit. Sipas rregullave të reja, një drejtues që kapet për herë të dytë me mbi 0.5 gram alkool për litër gjak, pasi është ndëshkuar më parë për të njëjtën shkelje, do të humbasë në mënyrë të përhershme lejen e drejtimit.
Rregulla të reja zbatohen edhe për shoferët e rinj. Personat madhorë që drejtojnë automjetin pa patentë nuk do të mund të regjistrohen në autoshkollë për një vit, ndërsa të miturit do të duhet të presin dy vite pas mbushjes së moshës 18 vjeç për të nisur procedurat për marrjen e lejes së drejtimit.
Për dy vitet e para pas pajisjes me patentë, drejtuesit e rinj do t’i nënshtrohen kufizimeve të veçanta. Ata nuk do të lejohen të konsumojnë alkool para drejtimit të mjetit, ndërsa kufiri i shpejtësisë do të jetë 90 km/h në autostrada dhe 80 km/h në rrugët jashtë zonave të banuara.
Shkelja e këtyre rregullave do të shoqërohet me gjoba nga 5 mijë deri në 15 mijë lekë, pezullim të patentës për një muaj dhe heqje pikësh.
Ndryshimet përfshijnë edhe rritje të masave për tejkalimin e shpejtësisë në zona të banuara dhe manovrat e rrezikshme, me gjoba që variojnë nga 20 mijë deri në 60 mijë lekë.
Gjithashtu, drejtuesit që kapen dy herë brenda një viti duke përdorur celularin gjatë drejtimit të mjetit do t’u pezullohet patenta për tre muaj. Ky ndalim do të vlejë edhe për drejtuesit e biçikletave, motorëve deri në 50 cc dhe monopatinave.
Një tjetër ndryshim është heqja e mundësisë për të shmangur pezullimin e patentës përmes pagesës së dyfishit të gjobës. Për lejet e drejtimit të lëshuara nga autoritetet shqiptare, pezullimi do të zbatohet automatikisht.
