Senati amerikan i thotë ‘Po’ Eric Wendt si ambasador i SHBA në Shqipëri

Senati i Shteteve të Bashkuara ka konfirmuar Eric P. Wendt si ambasadorin e ri amerikan në Shqipëri, duke i hapur rrugën emërimit të tij zyrtar në Tiranë.
Kandidatura e Wendt mori miratimin në seancën plenare të Senatit me 50 vota pro dhe 44 kundër, pasi ishte aprovuar më herët edhe nga Komiteti për Marrëdhëniet me Jashtë.
Tashmë, hapi i fundit i procedurës është nënshkrimi nga Presidenti i SHBA-së, Donald Trump.
Pas formalizimit të emërimit, Wendt pritet të mbërrijë në Shqipëri dhe të marrë zyrtarisht detyrën pasi t’i dorëzojë letrat kredenciale Presidentit të Republikës.
Me ardhjen e tij në Tiranë, Wendt do t’i japë fund një periudhe gati trevjeçare gjatë së cilës Ambasada e Shteteve të Bashkuara është drejtuar nga të ngarkuar me punë, pas përfundimit të mandatit të ambasadores Yuri Kim në vitin 2023.
Kush është Eric P. Wendt
Eric P. Wendt vjen në diplomaci pas një karriere të gjatë ushtarake. Ai ka mbi 30 vite shërbim në ushtrinë amerikane, ku pjesën më të madhe të karrierës e ka kaluar në njësitë elitare të forcave speciale “Green Beret”.
Ai ka drejtuar Komandën e Operacioneve Speciale të NATO-s dhe ka mbajtur funksione të rëndësishme në strukturat amerikane të sigurisë, me angazhime në Lindjen e Mesme dhe rajonin e Paqësorit.
Mes viteve 2017 dhe 2019 ka shërbyer si koordinator i sigurisë së SHBA-së për Autoritetin Izraelito-Palestinez, ndërsa më pas ka qenë edhe shef shtabi në Komandën e Paqësorit të SHBA-së.
Wendt është diplomuar në Universitetin e Kalifornisë në Santa Barbara dhe ka kryer studime pasuniversitare në fushën e sigurisë kombëtare në Naval Postgraduate School. Ai zotëron disa gjuhë të huaja, mes tyre arabishten dhe koreanishten.
Kjo nuk është hera e parë që emri i tij propozohet për një post diplomatik. Gjatë mandatit të parë të Presidentit Donald Trump, ai u nominua për ambasador të SHBA-së në Katar, por kandidatura nuk u konfirmua nga Senati.