Në një bashkëbisedim të hapur me kursantë dhe studentë të Akademisë së Sigurisë, një brez që ka zgjedhur jo rrugën më të lehtë, por atë më të drejtë: shërbimin ndaj qytetarëve dhe shtetit me uniformë. Diskutuam për çfarë është bërë deri më sot për sa i përket trajtimit financiar të punonjësve të Policisë së Shtetit dhe për atë që ne synojmë të ndërtojmë së bashku.
Fakt është se, prej kur ne nisëm të qeverisim Shqipërinë, pagat për Policinë e Shtetit kanë njohur një rritje progresive në çdo nivel, me përmirësime të ndjeshme, veçanërisht në vitet e fundit. Kjo nuk është thjesht statistikë, por më shumë motivim për efektivët, më shumë siguri për familjet e tyre dhe më shumë cilësi në shërbim ndaj qytetarëve.
Siguria nuk ndërtohet vetëm me ligje, por mbi të gjitha me njerëz të motivuar, të vlerësuar dhe të trajtuar me dinjitet. Prandaj, investimi në trajtimin financiar dhe kushtet e punës për Policinë e Shtetit do të vijojë, si pjesë e vizionit tonë për një polici moderne e në standardet e vendeve të Bashkimit Evropian.
Gjenerata juaj, si efektivë të ardhshëm, po hyn në një sistem që po ndryshon, që po përmirësohet dhe që po vlerësohet më shumë se kurrë më parë. Shqipëria ka nevojë për këtë brez të ri profesionistësh, që do ta çojnë përpara sigurinë dhe besimin te shteti.
