Basir Çollaku/ BelEdi, palët kanë rrokur armët

Palët i kanë armët në duar drejtuar njëri-tjetrit. BelEdi është dyshja Belinda dhe Edvini, siç i bashkojnë emrat e mbiemrat dyshe nëpër ekipe futbolli. Me 85 vota pro, asnjë kundër dhe asnjë abstenim, Parlamenti ka miratuar shkarkimin e Belinda Ballukut, nga posti i zëvendëskryeministres dhe ministres së Infrastrukturës dhe Energjisë. Nga numri total i mandateve të mazhorancës me aleatin PSD, mungon në ngritje kartonash, vetëm vota e ish-ministres, ende deputete. A janë gati votat e sotme të shprehen njëlloj për heqjen e imunitetit të saj?! Duke konsideruar të gatshme ato të opozitës. E pandehura Balluku në hetim deri tani për 11 procedura, ku kanë firuar 1.1 miliard euro, me një potencial kërkesë dënimi të deritanishme nga akuza deri në 35 vjet heqje lirie, ka ende fuqinë e sekreteve, për të mos shkuar në ekstrem afatesh në qeli. Serumi 1 apo 2-javor, nëse e pandehura nuk arratiset, mbyllet me adresë qelinë.
Provat
Rezistenca e Edi Ramës është frika. Eshtë paniku i shpërthimit të përgjimeve, videove, mesazheve. Diku rrjeteve sociale mori turr shifra 25 përgjime, gati në të zbrazur portaleve, nëse Rama luhatej. Sjellja e tij është demontim i ngadaltë i zëvëndëses, deri në një dorëzim të detyruar. Pranoi presionin e saj për të ndërruar kolltuqe në qeveri sipas oreksit të të pandehurës, duke dëshmuar “bindje” se po e mbron. Ec e besoi kurbanxhiut, që shtron sofër dhe në hënë thuaj. Tre furgonë dosje. Rrugë, ura e tunele të shembura. Aeroporte të plaçkitura. Anije energje të fikura. Porte te dhuruara vizave të kuqe. Ka të tjera të pamarra. 80 prova, Aty ka dëshmi, të penduar, dokumentacion, mesazhe, përgjime elektronike, mjedisore, rrëfime biznesesh vendase dhe të huaja. Porosi nga lart të ekzekutuara. Kanosje dëshmitarësh. Ndoshta edhe përfshirje nga shërbime të ndryshme, sepse mjaft procedime kapërcejnë kufirin. Frikacak thonë për njërin nga palët. Largqoftë por, frikacaku të vret, këshillon populli.
Armët
Zvarritja kohore e mos’heqjes së imunitetit, tregon se e akuzuara ka marrë zvarrë mazhorancën. Duke i pamundësuar përgjigje pozitive hetimit. A ka banda kriminale, grupe mafioze, segmente të krimit të organizuar, të rreshtuara në krah të kryeministrit njëra palë e në atë të zëvëndëses pala tejtër?! Ndonëse para zyrtarizimit të kësaj dosjeje mund të kenë qenë afërsisht bashkë!! Po. Ka. Kërcënimet për jetën i dëshmuesve, me mundësi “të penduari” të deklaruara nga prokurorët në Këshillin e Rregullores dhe mandateve, janë tregues se tensioni ka prekur fundin. Kanosja e kësaj natyre, ka si instrument armët e zjarrit. Autorët e mundshëm nuk janë axhami, por me arkiv të pasur në suksese të tilla. A ka mbërritur ky kërcënim te Kryeministri?! Rrethi i tij? Kjo duke hamendësuar se ai ka dijeni kush janë të fortët në Tiranë e rrethe, të kthyer në biznesmenë të mëdhenj falë firmosjeve të tij apo vartësve të tij, sidomos zëvëndëses..! Koordinatorët tij, mes bandave e qeverisë, më i fundit Agasi në kërkim, por njëherësh në veprim, ka angazhuar armët, duke i përdorur në zyra publike…
SPAK
Drejtësia e ka kryeministrin përballë, jo në krah. Braho në Bruksel ka marrë e dhënë një tjetër racion energje veprimi. Ramën e ka kundër, jo mbështetës. Hetimet për Ballukun kanë prodhuar dëshmi zyrtarësh e biznesesh, prova, sms e më tej, ku duhet përgjigja e shpjegimet përballë prokurorëve nga Edi Rama. Ndonëse pa emër të regjistruar në procedim, KM është detyrimisht në kohë shtesë, ku do të jetë zyrtarisht i ftuar nga SPAK. Nis me dijeni, ecën me hetim, vazhdon me i pandehur. Armët juridike mund të shpëtojnë përplasjen e madhe qeveritare nga armët fizike…!