Policia e Tiranës ka refuzuar të marrë përsipër garantimin e zhvillimit të protestës së PD, që është njoftuar të mbahet sot në orën 18:00 para godinës së Kryeministrisë.
Në një njoftim zyrtar, policia bën me dije se ky qëndrim vjen pas incidenteve të regjistruara në protestën e mëparshme, ku protestuesit hodhën mjete piroteknike në drejtim të efektivëve, ndërsa këta të fundit iu përgjigjën me gaz lotsjellës.
Përfaqësues të Partia Demokratike e Shqipërisë kanë njoftuar zyrtarisht zhvillimin e protestës më 28 shkurt 2026, në bulevardin përpara Kryeministrisë.
“Nisur nga incidentet e ndodhura gjatë tubimit të mëparshëm, ku u evidentuan akte dhune dhe përdorim i mjeteve të rrezikshme ndaj punonjësve të Policisë, pjesëmarrja e personave të maskuar dhe përdorimi i të miturve në tubim, si dhe nga informacionet e siguruara mbi mundësinë e përsëritjes së veprimeve të tilla, Policia e Tiranës i ka kthyer përgjigje subjektit politik se nuk merr përsipër garantimin e zhvillimit të tubimit.
Pavarësisht përgjigjes së kthyer, Policia e Tiranës, në përmbushje të detyrave funksionale, ka marrë të gjitha masat për garantimin e rendit dhe sigurisë publike në qytetin e Tiranës, mbrojtjen e institucioneve shtetërore, si dhe për lëvizjen e lirë të automjeteve dhe qytetarëve, në rast se tubimi do të zhvillohet.“, njofton policia.
