Me vendim të Këshillit të Ministrave, platforma TikTok është rihapur zyrtarisht në Shqipëri, pas më shumë se një viti pezullim. Vendimi është marrë këtë të mërkurë gjatë mbledhjes së qeverisë, ku është shfuqizuar akti që kishte vendosur masat e përkohshme ndaj rrjetit social.
Sipas vendimit të publikuar, shfuqizohet “Vendimi nr.151, datë 6.3.2025, i Këshillit të Ministrave, ‘Për marrjen e masave të përkohshme për shmangien e ndikimeve negative të platformës on-line TikTok’”, duke i hapur rrugë rikthimit të plotë të platformës për përdoruesit shqiptarë.
TikTok ishte pezulluar më 6 mars të vitit të kaluar, si pjesë e një pakete masash të ndërmarra nga autoritetet shqiptare për të adresuar shqetësimet mbi ndikimet negative të platformës, veçanërisht te të rinjtë dhe përmbajtjet e konsideruara të dëmshme.
Sipas burimeve institucionale, vendimi për rihapjen e TikTok vjen pas rishikimit të masave të sigurisë, politikave të përmbajtjes dhe bashkëpunimit me platformën, si dhe pas vlerësimit të ndikimit ekonomik dhe social të rrjetit social në vend.
Autoritetet theksojnë se rihapja do të shoqërohet me monitorim më të fortë të përmbajtjeve, masa për mbrojtjen e të miturve, si dhe nisma për edukimin digjital të përdoruesve.
Rihapja e TikTok pritet të ketë ndikim të menjëhershëm te krijuesit e përmbajtjes, bizneset online dhe të rinjtë, të cilët e përdorin platformën si mjet komunikimi, marketingu dhe të ardhurash.
Ndërkohë, ekspertët e sigurisë digjitale bëjnë thirrje për përdorim të përgjegjshëm të platformës dhe për forcimin e kontrollit prindëror mbi përdorimin e rrjeteve sociale nga fëmijët.
