Fshati i Linit, një prej perleve më të rralla të bregut shqiptar të Liqenit të Ohrit, ka marrë zyrtarisht statusin “Ansambël Arkitektonik Urban”. Ky vlerësim, që pritet të sjellë zhvillim të qëndrueshëm turistik dhe të forcojë mbrojtjen e trashëgimisë kulturore, e ngre Linin në një nivel të ri të njohjes kombëtare dhe ndërkombëtare.
Sipas arkeologes Froseda Tole, ky status përfshin jo vetëm pasurinë arkitekturore të fshatit, por edhe gjetjet e rëndësishme arkeologjike që e bëjnë Linin një vend unik në gjithë rajonin. “Statusi i ri ndalon çdo ndërhyrje që bie ndesh me identitetin kulturor të zonës dhe garanton ruajtjen e stilit tradicional të shtëpive me gurë, të ndërtuara kryesisht në shekujt XVIII dhe XIX,” shprehet Tole.
Një veçori e veçantë e banesave të Linit janë ballkonet lidhëse në katet e dyta, që dikur shërbenin si ura komunikimi mes fqinjëve dhe njëkohësisht si hapësira për ruajtjen e produkteve ushqimore. Ky element arkitektonik, i ruajtur ende në disa banesa, dëshmon për mënyrën tradicionale të jetesës dhe ndjenjën e komunitetit që ka karakterizuar banorët e Linit ndër shekuj.
Shpallja e Linit si Ansambël Arkitektonik Urban shihet si një moment historik, që hap rrugën për investime të reja kulturore e turistike, pa cenuar autenticitetin e fshatit. Me peizazhin e tij mahnitës dhe historinë mijëravjeçare, Lini po kthehet gjithnjë e më shumë në një destinacion të preferuar për vizitorët vendas dhe të huaj.
Zbulimet e fundit arkeologjike e kanë identifikuar Linin si vendbanimin palafit më të hershëm të njohur në Europë, duke i shtuar kështu rëndësinë historike dhe interesin ndërkombëtar. Ky hap vjen gjithashtu në përmbushje të kërkesave të UNESCO-s për ruajtjen e zonës së mbrojtur të Liqenit të Ohrit, një nga pasuritë më të çmuara natyrore dhe kulturore të Shqipërisë.
Në këtë mënyrë, Lini nuk është më vetëm një fshat buzë liqenit, por një dëshmi e gjallë e ndërthurjes mes historisë, arkitekturës dhe shpirtit njerëzor që e ka mbajtur gjallë për shekuj./Pogradecipress.al
