Është mësuesja dhe aktivistja e njohur Irma Marku që i është drejtuar Ministres së Arsimit, Ogerta Manastirliu si më poshtë:
Letër e hapur
Tiranë, 25 Gusht 2025
Drejtuar:
Znj. Ogerta Manastirliu, Ministre e Arsimit
Sindikatave të Arsimit Shqiptar
Opinionit Publik Shqiptar
Subjekt: Mungesa e respektimit të pushimeve ligjore të mësuesve dhe nevoja për korrigjim urgjent
Me datë 19.08.2025, Ministria e Arsimit ndërpreu pushimet e mësuesve dhe i thirri në shkolla para afatit. Ky vendim është arbitrar dhe bie në kundërshtim të drejtpërdrejtë me kontratën kolektive nr. 3641/1 prot., datë 09.06.2023, si dhe me nenet 92/2 dhe 181/8 të Kodit të Punës.
Sipas këtyre aktëve ligjorë:
Pushimi vjetor për mësimdhënësit dhe drejtuesit e institucioneve arsimore përbëhet nga 56 ditë pune;
Për periudhën e verës, pushimi nuk mund të jetë më pak se 45 ditë kalendarike;
Koha e pushimit mund të ndërpritet vetëm një herë, për nevoja të institucionit dhe për të garantuar funksionimin bazë të tij.
Ministria dhe Sindikatat duhet të marrin përgjegjësi: ky vendim shkel ligjin dhe kontratën kolektive, dhe e trajton mësuesin jo si profesionist me dinjitet, por si rezervist të thirrur sipas orekseve të administratës.
Urojmë që ky vendim tejësisht arbitrar të mos jetë paraprijës i të tjerave mohimeve e shtrëngimeve të punonjësve arsimorë, ndaj të drejtave të tyre profesionale dhe qytetare.
Ky është një mesazh që duhet ti bëj të reagojnë ata që guxojnë të shkelin të drejtat e mësuesve.
I bëjmë thirrje Ministrisë të korrigjojë menjëherë këtë padrejtësi me një VKM urgjente, ku mësuesit të mund të përdorin ditët e pushimit të pashlyera gjatë vitit akademik për nevoja personale, pa u lënë në dorë të “orekseve elektoralë” të drejtuesve që kërcënojnë me heqjen e ditëve nga rroga qesharake dhe e padinjitetshme.
Kjo nuk është vetëm çështje e mësuesve.
Është çështje e çdo qytetari që i dhemb e ardhmja e vendit;
Çështje e çdo prindi që kërkon një arsim cilësor për fëmijën e vet;
Çështje e çdo intelektuali që e di se pa mësues të respektuar nuk ka shtet, zhvillim apo dinjitet kombëtar.
Pushimet e mësuesit nuk janë luks. Ato janë e drejtë ligjore dhe garanci për një arsim të denjë dhe të shëndetshëm.
Mësuesi nuk është ushtar i thirrur me zile. Mësuesi është themeli i shkollës, i shoqërisë dhe i vetë shtetit.
Me respekt,
Irma Marku, mësuese dhe qytetare e angazhuar
