Pamja tjetër e dëbimit të të rinjve nga atdheu: studentë të huaj në universitetet shqiptare.
Në vazhdën e politikave të zëvendësimit të shqiptarëve të dëbuar me të huaj të lloj-lloj kombësive, kryeministri Edi Rama shpalli sot një tjetër “reformë” në arsim: ndryshimin e ligjit për arsimin e lartë për të mundësuar, sipas tij, ardhjen e studentëve të huaj për të studiuar në Shqipëri.
Plot 10 vite më parë, në pragpushimet e verës së 2015-ës, u miratua me shumicë kartonësh ligji nr. 80 për arsimin e lartë dhe kërkimin shkencor — një ligj i “importuar” me bujë nga sistemet anglo-saksone, por i kontestuar fort që në fillim nga pedagogët, studentët dhe ekspertët vendas e të huaj për pazbatueshmërinë e tij në kushtet shqiptare. Sot, ai ligj është një dështim i provuar, sepse rrëzoi shtyllat themelore të jetës universitare: lirinë akademike dhe autonominë institucionale.
Në mënyrë paradoksale, vetë kryeministri që e promovoi me entuziazëm ligjin 80, sot shpall dështimin e tij, rrënimin e sistemit arsimor, kapjen e universiteteve nga politika, goditjen e figurës së pedagogut dhe trajtimin e tij me përbuzje deri ne shantazhe, si në aspektin profesional, ashtu edhe në atë ekonomik.
Është koha të japim dëshmitë e gjendjes së pabesueshme në universitete, të klimës së komplotit, mbikqyrjes, shantazhit, të diskriminimit të figurës së pedagogëve, shkeljes së rëndë të standardeve etike dhe akademike.
Prezantimi i sotëm i kryeministrit– për të zëvendësuar edhe studentët shqiptarë me studentë të huaj – nuk është strategji për ndërkombëtarizim, por demagogjia e tij tipike për të mbuluar boshatisjen masive të auditorëve, mbylljen e mbi 100 degëve studimore, mungesën e përfaqësimit në rankime ndërkombëtare, mungesën e tregut të punës për të diplomuarit, mosmbështetjen e studentëve për të përballuar jetën universitare, dështimin e financimit të arsimit të lartë dhe kërkimit shkencor.
Është e vërtetë, jeta në universitete prej vitesh ka një klimë të mbushur me frikë e presione, mediokritet dhe largim të trurit : nuk ka vend për entuziazëm të rremë. Ka vetëm një rrugë: ose ndërmerren masa urgjente për t’i rikthyer dinjitetin arsimit të lartë dhe vlerën shoqërisë së dijes, ose përgatituni për një kolaps të plotë – për një dështim kolektiv të një kombi që nuk e mbrojti të ardhmen e vet.
