Presidenti Donald Trump njoftoi se Shtetet e Bashkuara do të vendosin tarifa prej “vetëm 30 përqind” për produktet e BE-së më 1 gusht. Në një letër drejtuar Presidentes së Komisionit Evropian Ursula von der Leyen, të cilën e postoi në Truth Social, Trump tha se deficiti tregtar i SHBA-së me BE-në ishte një kërcënim për sigurinë kombëtare. “Ne kemi diskutuar marrëdhënien tonë tregtare me BE-në për vite me radhë dhe kemi arritur në përfundimin se duhet të largohemi nga këto deficite tregtare afatgjata, të mëdha dhe të vazhdueshme, të cilat kanë lindur nga tarifat dhe masat jo-tarifore dhe barrierat tregtare. Fatkeqësisht, marrëdhënia jonë nuk është bazuar në reciprocitet.”
Trump shkroi gjithashtu: “Bashkimi Evropian do t’u ofrojë Shteteve të Bashkuara akses të pakufizuar në treg pa tarifa, pa na vendosur tarifa për të provuar të zvogëlojmë deficitin tonë të madh tregtar.” Çfarë nënkuptonte saktësisht Trump me këtë nuk është ende e qartë. Por, nëse BE-ja hap tregjet e mbyllura më parë për SHBA-në dhe largon barrierat tregtare, Trump – në një kuptim figurativ – deklaroi se një ndryshim në vendimet e mëparshme mund të merret në konsideratë.
Tarifat mund të rriten ose të ulen, varësisht nga zhvillimi i marrëdhënieve. Në letrën drejtuar Ursula von der Leyen, ai deklaroi se tarifat nuk do të zbatohen për BE-në ose kompanitë brenda BE-së nëse ato vendosnin të transferonin prodhimin në SHBA. Ai premtoi të lëshonte të gjitha lejet shpejt – brenda pak javësh. Sipas qeverisë amerikane, tarifat e shpallura prej 30 përqind nuk do të zbatohen për sektorë të caktuar – duke përfshirë makinat dhe çelikun. Kur u pyet nëse tarifat shtesë do të zbatoheshin edhe për grupe të caktuara produktesh si makinat, çeliku dhe alumini, Shtëpia e Bardhë i tha dpa-së: “Kjo është e vërtetë, tarifat sektoriale trajtohen veçmas dhe nuk shtohen së bashku.”
SHBA-ja tashmë ka vendosur një tarifë prej 25 përqind për makinat dhe pjesët e automjeteve të importuara nga BE-ja, ndërsa tarifat për çelikun dhe aluminin janë 50 përqind.
Lexo artikullin të plotë: https://www.dw.com/sq/trump-njoftoi-tarifa-prej-30-p%C3%ABr-importet-nga-be-ja-duke-filluar-nga-1-gushti/a-73259201
