Shkarkimi i një drejtori dhe ca të tjerëve për ndërtimet pa leje në Theth është lajmi i radhës që Rama kërkon ta shesë si “shenjë force” apo “vetëpastrim”.
Por në të vërtetë, është një akt i ulët hipokrizie, që përpiqet të krijojë idenë e një shteti që reagon, ndërkohë që në thelb, ky shtet është themeluar mbi heshtjen, bashkëpunimin dhe klientelizmin ndërtimor, dhunën ndaj qytetarëve e krimin e organizuar.
Të largosh një drejtor në bashkinë më të kriminalizuar të Shqipërisë për shtëpiza turistike pa leje, ngjan si piknik policor.
Sepse në Shqipëri nuk janë drejtorët që kanë legalizuar e zbatojnë politika.
Janë bashkitë që mashtrojnë e mbyllin sytë.
Janë agjencitë që firmosin në heshtje.
Janë ministrat që shpërndajnë favore, dhe është qeveria që ndërton pushtetin mbi betonin pa leje.
Aq më tepër në Theth, banorët e të cilit i nxiti dhe të cilëve ia kërkoi vetë Kryeministri të zhvillojnë turizmin familjar, të investojnë sepse donte votën nga ata.
Dhe ishte Bashkia ajo që i promovoi dhe i kërkonte vota.
Shkarkimi i një drejtori është thjesht një kokë turku.
Një flijim i vogël për të legalizuar ndëshkimin e qytetarëve dhe për të mbrojtur “të mëdhenjtë”.
Një truk i vjetër që e përdor çdo pushtet i korruptuar kur muret fillojnë të rrëzohen – jo muret e ndërtuara pa leje, por muret e mashtrimit institucional që kanë mbuluar për vite abuzimin me territorin, me ligjin dhe me qytetarët.
A është drejtori fajtor?
Ndoshta. Por jo më shumë se ata që e kanë emëruar.
Dhe me siguri shumë më pak se ata që i kanë kërkuar vota me çdo kusht.
Në këtë republikë, ndërtimi pa leje për perfitim politik është rregull, jo përjashtim.
Shihni vetëm Tiranën e binduni.
Dhe të ndëshkosh vetëm një zyrtar të rangut të mesëm është jo drejtësi, por gjueti shtrigash e porositur nga vetë shtrigat.
Po qytetarët e Thethit a kanë faj?
Aspak.
Jetojnë aty prej shekujsh e duan që dhuratën e Zotit e natyrës ta shndërrojnë në mikpritje, bujari dhe ekonomi.
Ata i nxitën, iu premtuan parajsën, i keqpërdorën dhe i hedhin sot mes katër rrugëve në emër “të ligjit”.
Po të kujt ligji?
Të atij për investorët strategjikë “skifterë” të pushtetit, apo ligjit shkatërrues për zonat e mbrojtura?!
Ndërtimet “pa leje” sic i quan sot Rama me Benetin e tij, nuk lindën dje.
Janë një industri politike, e ndërtuar për vota, me tolerim të organizuar, dhe me frikë të shpërndarë.
Ato nuk janë gabim teknik, por pasojë e një modeli pushteti që funksionon vetëm mbi shkeljen e ligjit dhe mashtrimit e dhunës me qytetarët.
Nëse vërtet do drejtësi, le të shkarkohet kryetari i bashkisë që i premtoi në këmbim të votës.
Le të hetohet ministri që lejoi në këmbim të votës.
Le të përgjigjet kryeministri që e ka bërë betonin kudo në Shqipëri dhe klientët personalë sinonim të zhvillimit.
Derisa kjo të ndodhë, çdo shkarkim i izoluar është thjesht një spektakël turpi që kërkon të mbulojë turpin e shkeljes me këmbë të djersës e mundit dhe dinjitetit të thethianëve e më tej.
Dhe ky vend nuk ka më nevojë për spektakël. Ka nevojë për llogari. Për përgjegjësi. Dhe mbi të gjitha: për ndëshkim të atyre që, me vetëdije, e kanë shndërruar Shqipërinë në një vend ku Maliqi i pushtetit bën ligjin.
