Kryeministri Edi Rama ka vijuar takimet në kuadër të “Dialogut për Bujqësinë”. Gjatë një takimi me fermerët, kreu i qeverisë ka kritikuar ashpër veprimtarinë e Autoritetit Kombëtar të Ushqimit (AKU), duke deklaruar se kjo strukturë po sjell më shumë dëme sesa përfitime. Për këtë arsye, Rama i ka dhënë urdhër ministrit të Financave që të pezullojë menjëherë veprimtarinë e AKU-së dhe të ngrejë një komision të posaçëm.
“Duhet menjëherë të pezullohet veprimtaria e AKU-së. AKU-ja duhet ndaluar me urgjencë që të mos vazhdojë të veprojë, sepse më shumë se sa mirë, po bën dëm”, deklaroi Rama.
Ai theksoi se duhet ngritur një komision i posaçëm për të analizuar të gjitha burimet njerëzore të AKU-së dhe për të rishikuar procesin e bashkimit të inspektorateve të ndryshme, siç është parashikuar me ligj. Sipas tij, ky proces duhet të kalojë përmes një seleksionimi të kujdesshëm të burimeve njerëzore që do merren me inspektim.
“Në këtë komision duhet të jetë pjesë edhe Universiteti Bujqësor i Tiranës, për të bërë një vlerësim serioz të burimeve njerëzore të AKU-së”, shtoi kryeministri.
Sipas tij, AKU është kthyer në shqetësimin më të madh për sipërmarrësit në sektorin e bujqësisë, por edhe për bizneset e shërbimit si restorantet, kafenetë dhe pikat e tregtimit.
“Në vend që të jetë partneri më i rëndësishëm, AKU-ja është kthyer në një shqetësim serioz. Më shumë se sa ndihmon, po pengon”, u shpreh Rama.
