Rinumërimet në PD, votë te kandidati i “gabuar” por partia e duhur !!

Po shtohet numri kandidatëve të PD që kërkojnë rinumërim, ndërsa matanë në mazhorancë, Rama e mbylli hapjen e kutisë së zezë.
Mirë bëjnë.
Pretendimet duhen verifikuar në çdo votë. Por në kërkesa dominon pretendimi i devijimit të votës së brendshme. Aq sa lë shteg se gara ka qenë jo përballje por disi rrëshkitje. Unë kam qenë një nga kandidatët e PD. Kam qëndruar në numërim gjatë deri në votën e fundit. Shihja numërues të dremitur e të lodhur. Skam dyshuar në asnjërin prej tyre. As sot jo. Mund të ketë shpëtuar ndonjë fletë e përgjumur nga djathtas rrotull apo majtas dhe anasjelltas, por nuk besoj të ketë qëlluar ndonjë tren rrëmbyes të brendshëm. Përpara numërimit ka pasur disa flirte. Po. Edhe brenda partisë edhe jashtë saj. Ka nga ata të mezipriturit e zgjedhjeve me uri e shihin si kohë ku të kapin ndonjë lek. Edhe komisionerë dhe numërues mes tyre. Ata janë shitësit e përhershëm djathtas dhe majtas. Për dy muaj i mësova me emra gjithësecilin edhe unë në qark. Kokërr për kokërr. Sa herë fusin dorën në xhep ata kanë aty tregtarin e shpirtit të tyre. Kjo transparencë e duhur është akt i nevojshëm përgjgjshmërie por jo një gjest politik. Sepse sado transferime rastësore apo të kontrolluara të votave preferenciale për këdo kandidat, vota e përbashkët politike nuk përmbyset. Plaçkitja e madhe nuk kthen të majtët në opozitë. Nuk e rrëzon Edi Ramën. As e bën PD më demokratike. As e forcon apo dobëson. Ne besoj unë, garuam për një mandat, për të bërë PD-në fituese. Kur kjo betejë u thye, plagosjet e brendëshme nuk duhen parë si fitore të thërmuara. Sepse edhe gabimet apo qëllimet e numrave kanë votues të përbashkët. Kanë numrin 1-sh në kokë pastaj plqyeshmëria personale. Ky është një Sizif në oborr që nuk na bën fitues. Kjo nuk është këshillë për të mos kërkuar rinumërim. Po. Numërues e vëzhgues të dërrmuar nga humbja do i ligështoni disi. Ata i njohin kreditorë e debitorë. Unë anoj më tepër nga akti politik ku forca e fakteve lëkund prodhuesit e shifrave, se sa më tepër te akti aritmetik, ku zgjidhja nuk ndryshon rezultat.. Një dorë vota të gabuara janë vërtet një problem, por problem i vogël, një mazhorancë e gabuar është problem dhe saktësisht problemi më i madh…
Nga Basir Çollaku