Multimiliarderi mbërrin në Durrës për të furnizuar superjahtin me karburant pa akcizë/ Basir Çollaku: Qoka shqiptare për dhëndrrin e ri Jeff Bezos

Superjahti 500 milonësh dollarë Abeona i multimiliarderit Jeff Bezos është ankoruar në kalatën 5 të portit të Durrësit për t’u furnizuar me karburant. Karburant pa taksa, pa akciza, vetëkuptohet.
Më pas do të lundrojë drejt Venecias për dasmën e pronarit me ish-gazetaren Lauren Sanchez.
Për të ftuarit e tij, Bezos ka prenotuar për tri ditë e tri netë 5 hotelet më luksoze të Venecias dhe pothuaj të gjitha gondolat e qytetit mbi ujë.
“Ky event do të ketë një impakt pozitiv ekonimik për komunitetin tonë. Do të përfitonen miliona euro”, shprehet me krenari Luis Brugnaro, kryebashkiaku i Venecias. Dhe ka të drejtë.
Po ne? Furnizojmë dhëndrrin e ri multimiliarder me karburant, as 60 lekë litri! Mbushim me karburant 60 lekë litri serbatorët e një superjahti gjysmë miliardi dollarë. Dorovisim me 60 lekë litri pronarin përkatës që e ka pasurinë 200 miliardë dollarë! Sa 25 buxhete vjetore të Republikës së Shqipërisë!
Gëzohu o popull që Jeff Bezos po celebron martesën e dytë! Ngazëllehu o popull që superjahti i tij zgjedh vendin tonë për t’u mbushur me karburant as 60 lekë litri!
Këto kanë rëndësi. Rëndësi jetike. Për të gjithë ne.
Me gëzime e trashëgime dhëndrrit të ri!
Dhe të mos gabojë të mos na e sjellë prapë jahtin për furnizim me karburant se do të na mbetet hatri rëndë.
Ne jemi aq bujarë sa bëjmë akte bamirësie dhe për multimiliarderët. Sidomos për multimiliarderët!