NËNË!
M’u lagën mendimet
Nga shiu i lotëve
Që pa pushim
Bie prej qiellit të vrenjtur.
Fjalët
Më janë tharë nga dhembja.
Duart
Më dridhen si mështekna
Nga erërat…
S’reshtin për asnjë çast
Pendimet…
Është dimër
Dhe fjalët kanë ngrirë,
Nga qielli
Si breshër më bëhen…
Në ajrin e qelqtë
Vizatoj portretin tënd
Dhe thellë,
Thellë, së brendshmi
Ndjej puhizën e ngohtë,
Buzëqeshjen tënde
Që më ngroh
Në këtë natë polare…
#rp
PAFAJËSI…
Përsëri aty,
Në cep të rrugës
Zgjatet një dorë,
Ja dhe një tjetër më tej,
Jo një, por dy
Duar që zgjaten
Me përulësi,
Ndërsa dhembja
Të shohë nuk ka sy.
Në zyrat e shtetit
Pushtetarët çirren si çakej
Kush e kush të gllabërojë
Sa më shumë pasuri
Nga ky i begatë vend
Që s’ka ardhmëri.
Ai përsëri aty,
Në cep të rrugës
Lyp pafajësi…
#rp
KUR TI NUK JE
Kur ti nuk je,
Mbrëmja
Tretet
Në harresë.
Nuk është
Më mbrëmje…
Kur ti
Je aty
Brenda
Një fshehtësie
Si vetë fshehtësia,
Mua më ikin
Krejt mendimet
Dhe veten
E shoh
Të robëruar
Te puthja…
#rp
***
Mbrëmjeve
Ajo sodit yjet
Dhe përhumbet
Në ëndërrim…
Aty dergjet
Shpirti im!
***
Lule,
Lule,
Lule,
Të bardha,
Të kuqe,
Blu…
Në liqenin e
Mjellmave
Valëzojnë
Kuturu…
Lule
Të bardha,
Të kuqe,
Blu
Brigjeve
Erëmojnë
Muzgun e
Shelgjeve
Lotues…
***
Dielli do të lindë sërish nesër,
Toka do të rrotullohet rreth saj,
Por unë s’di ç’të bëj me veten…
Të qesh, apo të qaj…?!
#rp
