A je e ndërgjegjshme se çfarë do të thotë që një i ri nga Jemeni, që e urren politikën, të vë veshin dhe buzëqesh, edhe pse po flet për politikë dhe je duke përshkruar katastrofat e vendit të tij?
A e kupton sa do të donte të qëndronte, qoftë dhe një herë të vetme, në këpucët e atyre idjotëve, të veshur me kostum e kravatë, e që bisedojnë me ty, vetëm për të të thënë sesa bukur dukesh?
Në atë intervistë, do të të tregoja sa magjepsëse je, saqë edhe lajmet e kronikës së zezë i bën tërheqëse dhe se e bën memecin të flasë.
Do të të flisja për sytë e tu, të cilët mbartin luftën dhe paqen, vdekjen dhe jetën…
Do të të thosha se dy buzët e tua ngërthejnë humbjen dhe fitoren, ndëshkimin dhe faljen!
E shtrenjta Kristina!
Tiparet e tua prej bjondeje janë kaq tunduese
Veshjet e tua të zeza e nxjerrin në pah bukurinë tënde.
Nishani jot në mes të krahut të majtë e dëshmon më së miri këtë.
Nishanet e tjera të cilat pushtojnë gushën tënde, nuk lënë as dhe një pikë dyshimi për padrejtësinë e madhe që i bëhet ngjyrës së zezë, kur vishet vetëm për ngushëllime…
Ty s’të lipsen fakte, dëshmitarë okularë apo gazetarë për vërtetësinë e lajmeve që përcjell…
Të lutem, shfaqu në një edicion të jashtëzakonshëm, deklaro se Jeruzalemi është çliruar, se në Sudan është vendosur rendi, se Siria është bërë e begatë dhe se lufta në Jemen ka përfunduar…
Fol për Trampin dhe thuaj se ka dhënë dorëheqjen, se qeveritë arabe kanë bojkotuar Amerikën, se Irani…
Thuaj që lideri ynë i mëparshëm Ali Abdullah Saleh është akoma gjallë dhe se presidenti aktual Abdu Rabuh është shtatzënë në muajin e shtatë!
Thuaji këto dhe unë do t’i besoj…
Me ty, të gjitha lajmet marrin vulën e besueshmërisë dhe të gjitha tragjeditë që kalojnë nga buzët e tua, shndërrohen në bekime.
Perktheu: Elmaz Fida
