“Për shumicën e njerëzve, Shqipëria është një enigmë. Një vend në Europë, por jo si pjesa tjetër e Europës. Më pak e rafinuar. Ndoshta më e egër rreth skajeve. Dhe kjo është ajo që e bën udhëtimin këtu kaq tërheqës. Kështu e përshkruan Shqipërinë si destinacion turistik për 2023, Lonely Planet, platforma prestigjoze në botë e turizmit.
E bukur nga jashtë, e bekuar me natyrën por ende shumë larg mundësive. Në Europë dhe në proçes integrimi, por ende shumë larg jetesës me dinjitet të qytetarëve europianë.
Megjithatë, në festat e fundvitit qëndron tradita e reflektimit e bilanceve.
Trofetë që shiten nga qeveria shqiptare si arritje dhe fitore, nuk janë trofe për xhepat e shqiptarëve,por më shumë ngjajnë me lëmoshë,që arkivohen si arritje në sirtarin e memories historike.
Festat e fundvitit janë periudha kur qytetarët shqiptarë shpenzojnë më tepër për shportën e konsumit në familjet e tyre. Edhe këtë vit, pavarësisht shfaqjeve me ngjyra e gjallëri, fasadën e mësuar përmendësh, kryeqyteti Europian i Rinisë pa rini, fuqia blerëse vjen e dobësohet gjithnjë e më shumë.
Çmimet rriten, familjet shqiptare varfërohen. Shpërblimet e fundvitit ecin me hapin e breshkës, në rastin më të mirë.
Korrupsioni dhe institucionet janë kthyer pothuajse në sinonim të njëra tjetrës.
Realiteti qëndron kokëfortë dhe pavarësisht dukjes; një përbindësh i kthyer në sistem, po e bën të vështirë rikthimin e shpresës tek qytetarët shqiptarë. Por jo të pamundur!
Një vend në Europë, por jo si Europa…
Europa nis të jetë afër nesh kur ne të punojmë drejt saj.
Europa nuk është çmim, nuk është as destinacion. Europa është një sistem vlerash që ndërtohet nga institucione të përgjegjshme, nga njerëz me integritet e vendosmëri për tu përmirësuar.
Europa vjen më afër nesh kur arsimi cilësor të jetë normalitet dhe jo mungesë.
Europa është një sistem shëndetësor që nuk të sëmur. Europa është një siguri që nuk të vret. Europa është sundim i ligjit dhe jo i parasë. Një qytetar që jeton me dinjitet në pronën e tij, me lirinë dhe të drejtën për tu zhvilluar.
Europa është mentalitet,sa afër aq edhe larg nesh.
Shqipëria, ky vend “enigmatik”për nga bukuritë dhe natyra, nuk ka pse të mbetet i tillë nga vështirësitë artificiale që e ndalojnë për tu zhvilluar. Enigma e vetme qëndron në zgjedhjen e alternativës më të lirë për nga fuqia blerëse këto kohë dhe mbijetesës për pjesën tjetër të vitit, vullnetit politik për të ndryshuar në radhe të parë modelin dhe pastaj vendin.
Deri atëherë, Viti i Ri do të mbetet i njëjti, per ata që do të jenë akoma këtu.
