Situata e sigurisë dhe paqes së brishtë në rajonin e Ballkanit po përshkallëzohet në mënyrë të rrezikshme ditët e fundit.
Gjendja alarmante e sigurisë në pjesën veriore të Republikës së Kosovës, parë në kontekstin e vënies në gatishmëri të plotë të forcave ushtarake serbe dhe instalimin e teknikës së saj ushtarake fare pranë kufirit me Kosovën, po rikthen makthin e konfliktit të përgjakshëm të viteve 90 në Kosovë.
Nisur nga aleanca e fortë gjeopolitike e historike ruso-serbe, veçanërisht është shqetësues ideja e një strategjie të ngjashme politiko-ushtarake kosovare me provokimet ushtarake e më tej me pushtimin brutal të Ukrainës nga Rusia.
Nga kjo situatë e rrezikshme që prish balancën imagjinare të status quo-s dhe paqes e sigurisë së brishtë të një rajoni të ngarkuar me pretendime territoriale ndërshtetërore, histori konfliktesh ushtarake, regjimesh hibride shtetesh dhe nacionalizmash ekstrem, mund të pritet çdo lloj skenari që i bie më shumë për shtat interesave serbe dhe taktikave destabilizuese të politikave ruse për Ballkanin. Rusia nën dritën e zhvillimeve të konfliktit në Ukrainë, është tepër e interesuar për të hapur një front të dytë konflikti në Ballkan me anë të një Serbie që duket se ende mban gjallë nacionalizmin, konfliktualitetin dhe agresivitetin mesjetar të hegjemonisë serbe në rajon.
Një konflikt i dytë ushtarak do të ndihmonte planet ruse jo vetëm për të tërhequr vëmendjen nga brutaliteti i pushtimit dhe lufta në Ukrainë, por rrjedhimisht mund të sjell reduktimin e ndihmës financiare e ushtarake që BE e SHBA i ofrojnë Ukrainës dhe ndoshta do të promovonte një fryme përçarëse mes anëtarëve të NATO-s, siç aktualisht po evidentohet me rastin e Hungarisë dhe paqartësisë dhe ngurrimit të Francës në raport me Ukrainën.
Nga ana tjetër, Serbia pavarësisht se nuk mund të dalë fitues në kontekstin territorial përballë një NATO të instaluar ushtarakisht në Kosovë, sërish po ia del qe jo vetëm të dobesoj ekzistencën e shtetit të ri vulnerabël të Kosovës, por edhe të ndertoj mjeshtërisht kauzën e një entiteti shtetformues etnik në miniaturë të Kosovës Veriore.
Pasiguria e paqartësia politike e BE-së, mungesa e një strategjie të qartë politike dhe qëndrimi kontrovers e jo totalisht në unison i diplomacisë ndërkombëtare, bashkë me pasivitetin diplomatik dhe “simpatinë që shteti shqiptar i ofron Vuçiçit dhe politikave te tij agresive, mund të jenë me pasoja serioze për ekonominë, sigurinë dhe paqen rajonale. Lufta në Ukrainë evidentoi edhe njëherë që shtete militare e autoritare si Rusia, nuk e kanë problem të rikthejnë në jetë konfliktet, vrasjet, genocidin dhe masakrat e përgjakshme të popullise civile si dhe shkatërrimin e infrastrukturës vitale në zemër të Europës. Për më tepër, nje konflikt i mundshëm nuklear, pavarësisht se për momentin duket i pakonceptueshëm, i promovuar nga retorikat shterpë të shteteve me nacionalizëm ekstrem, rend social i disbalancuar, të udhëhequra nga regjime totalitare si Rusia, nuk mund të mos merren në konsideratë.
