Tema e radhës atë ditë ishte diferencimi i arteve. Fjala diferencim e vuri në siklet të madh profesorin tonë. Ai na tha se po mundohej të gjente një term tjetër, por kjo ishte e vështirë për ta shprehur kuptimin e plotë të temës së shtjelluar. Ajo ishte bërë tashmë pronë e politikës dhe ishte kryefjala e saj. Mirëpo për klasën intelektuale që angazhohej për barazi dhe të drejtat e shqiptarëve të Kosovës në përgjithësi, ajo qëndronte si shpatë e Demokleut mbi kokat e tyre.
Fushata e diferencimit ideopolitik, pas demostratave të vitit 1981 u drejtua para së gjithash kundër profesorëve të Universitetit të Prishtinës dhe punëtorëve të arsimit në të gjitha nivelet.
Atë që e rrokte kjo fushatë e egër e politikës, përveçse ishte i larguar nga strukturat dhe organizatat politike, ai ishte edhe i veçuar, i leçitur nga shoqëria, por edhe i larguar nga puna, apo i tranferuar në një punë të parëndësishme të dorës së dytë.
Kishte të drejtë profesori, fjala diferencim ishte bërë shumë e parapëlqyer nga njerëzit e politikës, por shumë e urryer dhe e gërditshme nga intelektualët që angazhoheshin për barazi dhe të drejta kombëtare të shqiptarëve në Jugosllavi.
(fragment nga një shkrim më i gjatë)
