Mjafton të shikosh fotografitë dhe është fare e qartë se mbeturinat në qytetin e Tropojës, grumbullohen në një fushë sipërfaqësore dhe pa asnjë element të domosdoshëm për grumbullimin e mbeturinave.
Sikur të mos mjaftonte kjo, nga pakujdesia apo me qëllim, në grumbullim e tyre vihet edhe zjarri.
Qyteti i Bajram Currit, por edhe lagjet përreth tij, janë mbuluar nga një re e dendur tymi.
Kujtojmë se kjo është periudha, kur Tropojën e vizitojnë mijëra vizitorë nga gjithë Shqipëria, por edhe të huaj, të cilët shkojnë atje për Valbonën, për bjeshkët, për qytetin, për klimën.
Mjafton ky prezantim për të vënë në dyshim mrekullitë e alpeve tona.
Shqetësimin e ka përcjellë deputeti i Tropojës, Isuf Çela, në një postim në “Facebook”.
Ja postimi i tij:
“Situatë e njëjtë e cila përseritet me vend grumbullimin e mbetjeve e mbeturinave në rrethin e Tropojës, gjë e cila ndikon negativisht së pari në shendetin dhe jetën e qytetarëve, po ashtu edhe është një shije e pahijshme për turistët e shumtë që këtë periudhë vizitojnë bukuritë e Alpeve tona!!!!
Thirrja ime është për Bashkinë që t’i japin zgjidhje njëherë e mirë ketij problemi, pasi kjo është shkatërrim i jetës së banorëve dhe bukurive që Zoti ia ka falur Tropojës tonë të dashur!
