Ish-ministrja e Jashtme austriake Karin Kneisl pretendon se ajo u detyrua të largohej nga vendi për shkak të kërcënimeve për hakmarrje.
Lajmi u bë i ditur nga e përditshmja amerikane “The Washington Post”, duke cituar intervistën me Kneisl.
Shkrimi i W.P shoqërohet me foto Putin dhe Kneisl në vallëzim, realizuar nga Roland Schlager/AFP/Getty Images.
Kur u pyet nga një gazetar në WhatsApp, Kneisl tha se ajo “nuk jep intervista” dhe u detyrua të emigronte nga Austria për shkak të “kërcënimeve për hakmarrje”.
As Kneisl dhe as ‘The Washington Post’ nuk dhanë detaje.
Kujtojmë se Karin Kneisl mbante postin e Ministres së Jashtme në qeverinë e Sebastian Kurz që nga dhjetori 2017 nën kuotën e Partisë së Lirisë së ekstremit të djathtë.
Ajo dha dorëheqjen nga ministria pas rënies së qeverisë së parë Kurz, e cila ndodhi për shkak të skandalit të ryshfetit të Partisë së Lirisë.
Pas dorëheqjes nga ministria, Kneisl filloi të shkruante kolumne për transmetuesin propagandistik të Kremlinit, Russia Today (RT).
Kneisl mbahet mend gjithashtu për kërcimin me presidentin rus Vladimir Putin në dasmën e saj.
Në qershor të vitit 2021, ajo u bë anëtare e bordit të drejtorëve të Rosneft-it, por në maj të këtij viti ajo i dërgoi kompanisë ruse një deklaratë për dorëheqjen nga pozicioni i anëtarit të bordit të drejtorëve.
