Deputeti Tritan Shehu, me një status në rrjetet sociale, ka reaguar sot për mbledhjen e përbashkët të dy qeverive, të Prishtinës dhe Tiranës.
Thikë mbas shpine, shkelje mbi viktimat e konsideron Shehu, refuzimin e mocionit dhe Rezolutës për genocidin Serb në Kosovë.
Ja statusi i plotë i tij:
Rama sot përpara takimit ndërqeveritar duhet të sqarojë pse censurohet Mocioni e Rezoluta për njohjen e genocidit serb në Kosovë.
Nuk lejohet kjo kërkesë të futet as në rendin e ditës së Konferencës të Kryetarëve, megjithëse ky veprim është në kundërshtim flagrant me rregulloren.
Pra hipokrizi e plotë ajo që ai kërkon të luajë sot në Prishtinë!
Shkelje mbi viktimat, vuajtjet e sakrificat e popullit të Kosovës.
“Thike mbas shpine” ndaj partnerëve tanë, të cilët të bazuar mbi ato krime e genocid, ndërmorën ndërhyrjen ushtarake, që çoi në çlirimin e pavarësinë e Kosovës.
Një “avokati” tjetër kjo ne mbështetje te Vuçiçit, që jo vetëm nuk pranon atë genocid, por e quan agresion atë ndërhyrje shpëtimtare të NATO.
Dhe më tej “betohet” për Kosovën e Metohinë si pjesë e Serbisë.
Nga ana tjetër sot në atë takim Rama do të tentojë përsëri të servirë në një “tabaka” si ëmbëlsirë “Ballkanin e hapur”, për hir të të cilit:
Kosova duhet ta harrojë atë genocid!
Por dhe me shumë se kaq, Kosova duhet të bindë vehten se ato krime nuk kanë ndodhur kurrë.
Ndoshta gjithshka ka qenë një “ëndërr ” apo thjesht diçka e sajuar nga ata ushtarë të NATO, që të mund të hynin me 12 Qershor!
Kosova e gjitha duhet të vuajë nga Alzheimer- rekomandon Rama.
Kjo qenka në të mirë të saj, sepse ndryshe rrezikohet ai «Ballkani i hapur» i Vuçiç, i servirur si një ëmbëlsirë në tabaka prej tij.
Kur në fakt ai është vetëm një “helm” i guzhines së Serbisë për të zbehur pavarësinë e Kosovës, konsoliduar hegjemoninë e saj, krahas pasojave të tjera dëmtuese, që përmban për Shqipërinë, Kosovën e Rajonin.
Kjo është e vërteta e asaj komedie që Rama do të përpiqet të luajë sot ne Prishtinë.
Sa do ta besojë Prishtina e çfarë përgjigje do t’i japë, kjo mbetet për tu parë ….
…Por unë jam optimist për prologun!
