Demokratët po përpiqen të kapërcejnë problemet me
njëri -tjetrin, por ende ka kontradikta.
Jo vetëm përplasja brenda grupit parlamentar, por edhe në strukturat lokale shfaqen debate.
Nga rastet më të freskëta në kohë është Kruja, një qytet tradicionalisht i djathtë, ku duket se ka moskuptime brenda anëtarësisë.
Një thirrje ka drejtuar në rrjetet sociale Sabah Sheta, i cili e ka drejtuar degën për disa kohë.
Sheta thotë në prononcimin e tij se duhet bashkim për të mundur Kajmakët e Ramës.
Ja postimi i plotë i tij :
“Miq, duke parë reagimin e disave, në një postim timin të mëparshëm, rreth një takimi që kemi bërë sot me një grup demokratësh, ndihem i detyruar të shpjegoj mendimin tim për aktivitetin, por edhe për ecurinë e PD-së.
Ky është mendimi im i thjeshtë për gjendjen…
Opozita e bashkuar e mund pushtetin e Kajmakëve të Ramës !
Shqetësimi që do trajtoj, nuk është personal, por si i çdo demokrati tjetër.
Të hedhësh opinione për situatën në radhët tona në këtë kohë nuk është e lehtë, disa kënaqen, të tjerë të gjykojnë, por më mirë të diskutojmë sesa të heshtim. Gjyqet e tilla nuk japin produkt, veç krijojnë akuza e kundërakuza.
Duke u ndjerë detyrues ndaj atyre me të cilët kam punuar, do jap mendimin tim modest për gjendjen tonë.
Nuk jam idhtar i njërit apo tjetrit, por respektues i emrit të Sali Berishës e Lulzim Bashes ,Jozefina Topallit, Enkelejd Alibeaj e Jorida Tabakut, Flamur Nokës e Oerd Bylykbashit, Luciano Boçit, Merita Bakiut, Zef Hilës dhe çdo deputeti që ka shkuar në parlament me votat tona
Si i tillë, e pohoj me të madhe se Shqipëria nën drejtimin e Dr Berishës ishte me ekonomi më të mirë, zhvillim dhe rritje ekonomike të dukshme. Ishte me shpresë dhe bindje se ky vend po bëhej.
Tirana nën drejtimin e Bashës ishte më e lirë, më e jetueshme dhe nuk sundohej nga grataçelat e betonta.
Opozita e gjatë dhe dështimi në disa zgjedhje i ka mbushur demokratët me pakënaqësi ndaj drejtimit në 8 vite, por më shqetësuese është e ardhmja.
Po gabime ? Po, kemi gabuar, simbas shkallës së përgjegjësisë, dikush më shumë, dikush më pak, veç demokratët e bazës nuk gabuan kurrë, ata punuan e mbështetën me shpirt në këto vite çdo drejtues të tyre.
Atyre ju përulem…
A do kemi fuqinë të bëhemi bashkë përsëri?
A do frenojmë dot largimet masive të demokratëve me familje sepse ky elektorat po largohet më së shumti nga vendi.
Unë mendoj, po, ne kemi fuqinë të shkelim egoizmin tonë dhe të përballemi me qeverinë e krizës.
Është nevojë e ngutshme që demokratët të shohin njëri tjetrin në sy, të mblidhen në të njëjtin seksion apo degë zonale.
Kjo duhet të ndodhë sa më parë, nga baza deri në qendër.
Kjo përgjegjësi ju mbetet drejtuesve të lartë, që të evidentojnë njerëzit me peshë, me kontribute dhe të aktivizohen në zonat e tyre të influencës.
Demokratët nuk mund të lejojnë më që grindja të vazhdoi dhe strukturat të dobësohen.
Momenti është që të gjithë të mendojnë vetëm për bashkim, vetëm për aksion dhe përballje me pushtetin e Edi Ramës.
Demokratët ndihen të shqetësuar dhe këtë shqetësim e ndjejmë çdo ditë, por më shumë e ndjeva sot, kur një grup i madh me aktivistët tanë në Krujë, na thirri së bashku me deputeten Bakiu, për një bisedë e për të qarë hallin së bashku.
Me deputeten e zonës, znj.Merita Bakiu e gjykuam që nuk mund të refuzonim ftesën e tyre, të demokratëve, të komisionerëve tanë, të atyre që mbajnë peshën e opozitës në Krujë.
Shkuam, jo për karshillëk, por sepse çdo kush nga ne që ka patur një rol në strukturë, duhet të jetë me ta, të flas dhe të dëgjoi zërin e tyre.
Një shqetësim prevalon te demokratët: Bashkimi !
Këto ishin fjalitë që u dëgjuan më shumë në bisedën e sotme”
