Nga Xhevat Mustafa/ Zjarret në Sazan, “piromanët” në Tiranë!

Zjarret që vazhdojnë prej ditësh në ishullin e Sazanit kanë lakuriqësuar gjendjen shqetësuese të aftësisë parandaluese dhe eleminuese të fatkeqësive të tilla nga forcat e emergjencës civile e ushtarake, në kuadër të Ministrisë së Mbrojtjes apo të Ministrisë së Punëve të Brendshme! Njëkohësisht, kanë ndezur një zjarr debatesh edhe në media, rrjete sociale, kafenera… Pyetjet vërtiten rreth këtyre çeshtjeve: kush apo cilët i ndezën zjarret? Cilët në Shqipëri apo në një vend tjetër ia kanë vënë syrin Sazanit, ideal për resorte të mëdha turistike dhe “fshihen” si struci në rërë pas tyre? Si ka mundësi që formalisht apo juridikisht kemi ushtri në NATO dhe paradoksalisht e kemi “për faqe të zezë” për nga aftësia njerëzore dhe teknike, nga toka dhe ajri, për t’u përballur me zjarre të fuqishme e për të fituar shpejt ndaj tyre? Përse e vonuan 30 vjet, që t’ia jepnin për një bazë të madhe ushtarako- detare SHBA- NATO-s??? Apo një kompania të fuqishme ndërkombëtare, europerendimore, turke, arabe…turizmi modern, sipas përvojës së Korfuzit fqinj apo të ishujve grekë më të largët??? Përse po vonohet ndihma nga vende të afërta, aleate në NATO? Cilët duhet të mbajnë përgjegjësi, në Vlorë e Tiranë, lart në qeveri, sidomos në Ministrinë e Mbrojtjes, për këtë ngjarje, që nga shumica e këndvështrimeve nuk mund të trajtohet, kalohet dhe arkivohet si “fatkeqësi natyrore”???
Disa atakojnë “për indiferentizëm apo heshtje” edhe ambasadoren amerikane Yuri Kim, të mësuar ta shikojnë dhe dëgjojnë të reagojë publikisht për çdo problem, që lidhet me Shqipërinë, pozitën, opozitën, politikën, qeverinë, shtetin, drejtësinë, zgjedhjet parlamentare allashqiptare, korrupsionin, non gratat amerikane… Ndoshta ky qëndrim i saj mund të shpjegohet me bindjen që mund të ketë në vetvete? Me humor: ajo mund edhe të mendojë:”unë fus duart në zjarret e Sazanit dhe nuk e ndryshoj bindjen, se nuk ka dorë e faj për këto Rama-qeveria, por vetëm ai…non grata im, Salia…”!