Enkelejd Alibeaj në fjalën e tij në parlament ka kërkuar nga qeveria që të arrihet marrëveshja e ekstradimit me Emiratet e Bashkuara.
Ai tha se Dubai është kthyer në parasjë për grupet kriminale shqiptare.
Gjithashtu në fjalën e tij ai citoi deputetin tjetër demokrat, Ervin Salianjin, i cili pati deklaruar më parë se këtu kërcet arma, në Dubai hapet shampanja. Alibeaj tha se opozita do të votojë pro një marrëveshje të tillë.
“Ky do të jetë qëndrimi ynë për këto marrëveshje. Duke qenë se janë marrëveshje ndërkombëtare dy gjëra duhet t’i themi. Dubai ju thotë gjë? Banda e Durrësit ju thotë gjë? Banda e Elbasanit ju thotë gjë? Bandat në këtë vend kanë gjetur parajsën e tyre në Dubai.
Ministrin e Brendshëm e kuptoj që thotë po unë e kam bërë punën time kemi lidhur një marrëveshje. Një marrëveshje për shkëmbim të dhënash. Të dhënat që i ka kushdo sot në internet. Kjo quhet arritje?! Arritje duhet të ishte imazhi i Shqipërisë kur Emiratet e Bashkuara Arabe kanë kërkuar një marrëveshje.
Atyre u ka lindur një problem dhe kanë kërkuar këtë marëveshje. E dëgjova ministrin e Drejtësisë që nuk tregoi një provë të vetme nëse ka kërkuar marrëveshje ekstradimi me Emiratet e Bashkuara Arabe. Kjo tregon mungesë vullneti për të luftuar krimin. Është e vërtetë ajo që ka thën Salianji. Këtu kërcet atje hapet shampanja. Kjo është këmbanë alarmi”, deklaroi ai.
