Një defekt i rëndë kombëtar në rrjetin e transmetimit të të dhënave për kontrollin e trafikut ajror në Itali ka krijuar një situatë kaotike udhëtimi në të gjithë Europën këtë të premte, 16 tetor 2026.
Avaria ka prekur drejtpërdrejt Aeroportin Ndërkombëtar të Tiranës (TIA), duke lënë qindra pasagjerë të bllokuar pas anulimit të menjëhershëm të të paktën 8 fluturimeve drejt gadishullit fqinj.
Problemet e para teknike janë konstatuar gjatë natës në infrastrukturën e ENAV (Ofruesi i Shërbimeve të Lundrimit Ajror në Itali).
Edhe pse sistemet e emergjencës arritën të mbanin fluturimet normale deri në orën 06:00 të mëngjesit, shtimi i trafikut ditor dhe vazhdimësia e avarisë i detyroi autoritetet të ndërmerrnin një hap ekstrem: përgjysmimin e kapacitetit të menaxhimit të hapësirës ajrore në 50%.
Ky kufizim i përkohshëm u vendos për të garantuar sigurinë maksimale të pasagjerëve në ajër, pasi kontrollorët nuk mund të përpunonin dot numrin e plotë të avionëve.
Përmes një deklarate zyrtare, ENAV ka sqaruar se përjashtohet plotësisht mundësia e një sulmi kibernetik apo sabotimi. Defekti lidhet pastërtisht me rrjetin gjeografik të shpërndarjes së të dhënave dhe komunikimit mes kullave dhe radarëve.
Rinasi
Efekti i këtij bllokimi u ndje menjëherë në Rinas. Sipas të dhënave nga Ministria e Infrastrukturës dhe Energjisë, deri më tani janë konfirmuar të anuluara fluturimet që lidhin Tiranën me linjat kryesore si Milano (Malpensa), Torino, Verona, Pisa, Rimini dhe Gjenova.
Ndërkohë, në aeroportet kryesore italiane si Rome Fiumicino, Milano Linate dhe Napoli Capodichino, vonesat për fluturimet që kanë mundur të ngrihen po luhaten nga 30 minuta deri në më mbi dy orë.
Situata është rënduar edhe më shumë për shkak të një greve kombëtare 24-orëshe të pilotëve dhe stjuardesave të kompanisë “easyJet” në Itali. Për pasojë, kjo kompani po përballë bllokimin më të madh të pasagjerëve në Europë këtë fundjavë.
Aeroporti Ndërkombëtar i Tiranës deklaroi se është në koordinim të plotë me linjat ajrore për të minimizuar impaktin te udhëtarët.
Të gjithë qytetarët që kanë planifikuar të fluturojnë drejt ose nga Italia gjatë orëve në vijim, këshillohen të mos nisen drejt aeroportit pa konfirmuar statusin e fluturimit në aplikacionet zyrtare të kompanive respektive, pasi priten anulime të tjera zinxhir.
