Një ditë më parë qeveria u kujdes që të përhapte disa lajme sikur nga Brukseli do të kishte sinjale pozitive lidhur me atë që njihet si procesi i IBAR, në veçanti mbyllja e grupkapitullit të parë që ka të bëjë me shtetin ligjor.
Ishte një atmosferë entuziaste. Ministri i Drejtësisë në një dalje për mediat i nxiti edhe më shumë këto tituj, duke thënë se IBAR ishte konfirmuar, pritej vetëm një dakordësi formale.
Me kalimin e orëve, pati një zbehje. Asnjë lajm i tillë nuk po vinte nga Brukseli. Sot pjesa më e madhe e mediave raportojnë se IBAR nuk është kaluar. Vendet anëtare kanë sërish kërkesa e pretendime. Mediat raportojnë me burime.
Pyetja që lind është se përse qeveria nuk bën transparencë?
I njëjti ministër që doli dje ballëlart e tha se ishte kryer, përse nuk del sot të sqarojë opinionin?!
Integrimi europian nuk është çështje e private e qeverisë që kur i teket e bën pjesë të publikut dhe kur nuk ka interes, e mban të fshehtë.
Ministrat përgjegjës që janë të zhurmshëm dhe flasin pa fund për çdo temë, të dalin sot e të thonë: A u miratua IBAR, a u mbyll grupkapitulli që po mban të ngrirë integrimin?
Nëse po, shumë mirë, le të ecet me hapat e tjerë. Nëse jo, çfarë ka ndodhur?!
Kjo është një përgjegjësi bazike që qeveria duhet ta ketë e ta ushtrojë.
Mos ta lërë këtë çështje në errësirë e në raportimet mediatike me burime.
