Lajmi se një kryebashkiak në Jug të vendit ishte diagnostikuar me virusin seksualisht të transmetueshëm dhe veç tij, me të njëjtën diagnozë ishin edhe disa nëpunëse, tronditi opinionin publik.
Përhapja në shumë media dhe rrjetet sociale bëri që kryebashkiaku i Gjirokastrës të publikonte rezultatet e analizave të gjendjes së tij dhe të përgënjeshtronte lajmin.
Mbas kësaj, mësohet se është bërë kallëzim ndaj aktivistit gjirokastrit, Emin Kokalari (foto e tij marrë nga faqja e tij dhe vendosur nga redaksia).
Më poshtë njoftimi zyrtar nga Policia e Shtetit:
Procedohet penalisht një 33-vjeçar, pasi dyshohet se ka përhapur informacione të rreme në rrjetet sociale, duke shkaktuar panik te qytetarët, me pretendimin se kryetari i bashkisë dhe punonjës të bashkisë janë të infektuar me HIV/AIDS.
Specialistët për Hetimin e Krimeve në Komisariatin e Policisë Gjirokastër referuan materialet në Prokurori, ku nisi procedimi penal për shtetasin E. K., 33 vjeç, banues në Gjirokastër, për veprën penale “Përhapja e informatave të rreme që ngjallin panik”. Në cilësinë e provës materiale u sekuestrua celulari i 33-vjeçarit.
Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
