Një shkrim, thirrje shoqërore kulturore, për atë se çfarë e bën një qytetar të mirëfilltë.
Një qytetar përpara se ai të ketë pëlqime të ideve politike, dhe ideologjive, i majtë dhe i djathtë, njeriut i duhet të jetë qytetar i plotë me dije, i formuar e të bëhet i mençëm, të jetë i plotësuar me logjikën dhe kritikën, dhe qe di çfarë është e mirë për veten e vendin e tij.
——————————-
Si të votoj kur nuk di kë të votoj?
Kjo është pyetja e atij elektoratit gri vota e të cilit do bëjë diferencën më 11 maj. Por, edhe ai që qartazi është pozicionuar në krahun e qeverisë (nuk them majtas se kjo qeveri nuk është e tillë.), duhet të reflektojë për votën e tij.
– Të pakënaqur jemi sa s’ka, -më tha dikush, – po ne jemi të majtë, andej do votojmë. Pyetja ime është: Je me Edi Ramën apo je i majtë?
Nëse je me të parin, edhe po të ishe njeriu më besnik, do votoje kundër. Vota kundër do ishte shenjë mirëdashjeje pas dymbëdhjetë vjet qeverisjeje. Vota jote kundër do t’ia gërvishte cipën e hollë të delirit që e ka fshehur atë çka mund të ketë qenë e mirë te ai dhe do ta shkundte. A nuk bëjmë kështu me ata që duam? A nuk përpiqemi e bëjmë ç’mundim për t’ua ndalur rrokopujën në rënie të lirë? Kështu do t’i krijoje mundësinë të ndalte, të dilte nga bulëza dhe të merrte kohë për të parë më qartë. Njëherazi me sytë e rinj fillon edhe shërimi. Nuk do e dimë në ka apo jo shërim për të, për aq sa nuk do i jepej një dorë për kurim.
Ju ndjekës të zjarrtë, mësoni të doni me zemër të çlirët nga interesi meskin. Kini mirësi për atë që ju ngriti aq sa nuk do e kishit ëndërruar as vetë, edhe ju që ia keni parë hairin kësaj qeverie. Ju dha mundësi për të blerë diploma, ju veshi me kostum, ju mësoi të dukeni të ditur e me një barrë mend, sidomos kur thoni ” Në fund të ditës …”. Falë tij ju u bëtë performues që u duartrokitët dhe kjo nuk është pak për dikë që jo vetëm nuk e njeh politikën, jo vetëm që nuk i ka lexuar një të vetëm libër filozofisë së politikës, por nuk ia ka haberin kontributit të të mëdhenjve të kësaj bote as në formë anektodike. Ai do donte të ishit bërë liderë, por ju nuk ju doli koha mes seancave të botoksit, mbjelljes së flokëve, qepjes së kostumeve… përmirësimit afatshkurtër. Paskeni qenë ekonomistë të hatashëm, mor! Investim i shpejtë për imazh të qëndrueshëm.
Por, të kthehemi te tema jonë. Kini mëshirë për atë që jua mbushi çanakët plot, ju që jua mbushi. Ju të tjerët, ndjekës çanakëboshë, kini mëshirë për të, se atë e doni më shumë se vetja, por edhe për veten. Prijini fijet e rrethit vicioz. Mos qëndroni në plagët që i marrim nga fëmijëria e hershme. Mos vazhdoni ta quani veten jolegjitimë e legjitimoni përçudnimin e logjikës e të bonsesit të qytetarisë aktive. Prijini fijet e plagës së tradhëtisë që ndiejnë disa në vegjëli psh. kur në familje vjen vëllai a motra më e vogël e kultovojnë një maskë që i largon nga vetja. Mos u bëni tradhëtari juaj i parë. Se kush bën idhuj tradhëton Zotin dhe veten, sigurisht.
Si të votosh kur nuk di kë të votosh? Mbaj parasysh një gjë: qytetari është gjithmonë në oponencë, qytetari revoltohet. Revoltën e tij e shpreh me votë. E nëse pasi lexove këto radhë ti e kupton se kë nuk duhet të votosh, ke ende edhe një javë për të kuptuar se kush të bind më shumë. Ama mos u bëj kurrnac. Ec me bindjen humaniste se gjithkush është i denjë për besim deri sa nuk ka dhënë prova për të kundërtën. Ti di si të votosh përsa kohë nuk të pëlqen të konsiderohesh çyryk apo zgjatim i një bashkësie ku të gjithë ruhen nga të gjithë.
