Nga Enver Robelli
Stefan Kornelius do të jetë zëdhënës i qeverisë së re gjermane. Kështu njoftoi të martën “Süddeutsche Zeitung”, për të cilën Kornelius ka punuar që nga viti 1991. Fillimisht ai shkroi si korrespondent nga Bonni, pastaj, gjatë presidencës së Bill Clintonit dhe intervenimit të NATO-s për çlirimin e Kosovës, raportoi si korrespondent nga Washingtoni. Në vitin 2000 u bë shef i resorit të politikës së jashtme të “Süddeutsche Zeitung”. Gjatë karrierës së tij Kornelius u shqua sidomos si komentator i çështjeve të politikës së jashtme dhe të sigurisë.
Është autor i një biografie të shumëlavdëruar të kancelares Angela Merkel, të cilën në vitin 2013 e kam përkthyer në gjuhën shqipe dhe është botuar nga KOHA. Gjatë një periudhe të rëndësishme të karrierës sime si korrespondent i “Süddeutsche Zeitung” dhe “Tages Anzeiger” me seli në Zagreb, Kornelius ka qenë shef imi.
Kur në korrik 2010 Gjykata Ndërkombëtare e Drejtësisë e quajti legal aktin e shpalljes së pavarësisë së Kosovës, Kornelius komentoi, mes tjerash, me këto fjalë në “Süddeutsche Zeitung”: “Për dëshirën e një populli për liri nuk ka kufij, as juridikë. Një shtet heterogjen nuk mund të mbahet i bashkuar me forcë për një kohë të gjatë. Por, nga ana tjetër, kjo dëshirë për liri mund të realizohet vetëm nëse raporti i forcave e lejon këtë”.
