Opozita shqiptare ndodhet në një moment kritik. Pas daljes së listave dhe lodhjes së akumuluar nga betejat e kota, shumë prej atyre që duhej të ishin në ballë të fushatës duken të hutuar, të demoralizuar ose thjesht të palëvizshëm.
Por ky nuk është momenti për të pritur, për të kalkuluar apo për të parë si rrjedhin ngjarjet. Ky është momenti për të vepruar.
Opozita ka nevojë për një riformatim urgjent, të thellë dhe të guximshëm. Nuk mund të vazhdojë të mbetet peng i të njëjtëve emra, të njëjtave skema, të njëjtave llogari të vjetëruara politike. Ka ardhur koha që në qendër të saj të vihen ata që kanë treguar integritet, guxim dhe qëndrueshmëri në qëndrimet e tyre – gra të forta dhe të afta, të rinj idealistë që nuk e kanë ndotur veten me pazare politike, njerëz që e kuptojnë se opozita nuk është një klub i mbyllur, por një mision.
Ky nuk është një apel abstrakt. Kjo, është një thirrje e drejtpërdrejtë për të lëvizur! Opozita nuk ka më kohë për të humbur me përçarje sterile apo me luftëra të vogla mes klaneve. Ka nevojë për një valë të re energjie, për njerëz që nuk janë lodhur nga beteja pa hyrë ende në të. Dhe këta njerëz ekzistojnë. Janë ata që nuk kanë heshtur kur ka qenë më e lehtë të heshtnin, janë ata që kanë mbajtur qëndrim kur shumë të tjerë kanë bërë kompromise.
Është koha që këta zëra të dalin përpara. Është koha që opozita të ketë një fytyrë të re, një forcë të re dhe një qëllim të qartë: të rikthejë besimin e shqiptarëve në ndryshim.
Kjo nuk është një çështje dëshire, është një Domosdoshmëri.
Koha ēshtë që ta shkundim këtë strukturë dhe ta ringjallim me energji të re, me individë që e kuptojnë se koha për ndryshim është tani. Për të arritur këtë, duhet të kalojmë përtej emrave të njohur dhe të zgjerojmë horizontin, duke përfshirë njerëz që kanë treguar guxim, integritet dhe qëndrueshmëri – gra , të rinj, dhe liderë të rinj që nuk kanë pasur frikë të sfidojnë sistemin e vjetër dhe të mbrojnë interesat e qytetarëve.
Këta individë janë gati të dërgojnë opozitën në një drejtim të ri, një drejtim që reflekton nevojat e një shoqërie që kërkon transparencë, drejtësi dhe zhvillim të vërtetë. Njerëzit e rinj të angazhuar dhe me integritet janë gati të udhëheqin ndryshimin. Ky është momenti për të ndryshuar.
Ky është momenti për të krijuar një Opozitë të vërtetë, që nuk ka frikë të sfidojë asgjë, përveç mungesës së ndryshimit.
#PërNjëOpozitëTëVërtetë–Ndryshimi fillon tani!”
