Ne shqiptarët, fatmirësisht, kemi gjakun tonë një njeri bashkëkohor ndër më të njohurit në botë, njëkohësisht ndër më të respektuarit, më të pakontestuarit dhe më të sakrifikuarit për njerëzimin. Emri i bekuar i Nënë Terezës bën të shkrihet çdo akull, çdo paragjykim dhe çdo dyshim kur prezantohesh si shqiptar kudo në botë, sepse krijohet lidhja instinktive midis madhështisë së zemrës së saj dhe prejardhjes së saj shqiptare, duke nxjerrë në pah zemrën e madhe dhe të bardhë të çdo shqiptari. Rrjedhimisht, marka jonë kombëtare nën emrin e saj ka një shkëlqim natyral dhe një veçanti të pakrahasueshme me asnjë popull tjetër të Evropës moderne, deri në nivel global. Ngjashëm me Gandhin në Indi ose Martin Luter Kingun në Amerikë, të cilët ndikuan një epokë, Nënë Tereza ka një ndikim të papërsëritshëm. Madje, ajo i ka bërë shtetet fqinje të ndjejnë një lloj zilie. Për shembull, Serbia e ka marrë Nikola Teslën si markë kombëtare, i cili veproi në Amerikë dhe me gjak ndoshta ishte shqiptar ose kroat. Maqedonia ka gjetur dhe rrëmbyer Aleksandrin e Madh, i cili nuk ka asnjë lidhje me sllavomaqedonasit e sotëm. Greqia, nga ana tjetër, lavdëron disa filozofë të lashtë, të cilët nuk dihet me siguri nëse kanë ekzistuar vërtet. Por askush nuk ka nje Gonxhe Bojaxhi.
Por, a dihet botërisht se Nënë Tereza ishte shqiptare? Siç e dinë të gjithë se Gandi ishte indian, a e dinë të gjithë se Nënë Tereza ishte shqiptare? Jo! Shumë e njohin Nënë Terezen tonë si indiane, si “Nënë Tereza e Kalkutës”, jo si shqiptare. Por pse nuk dihet kjo? Përveç arsyeve historike, një problem tjetër i madh është se vetë shteti ynë jo vetëm që nuk e promovon atë, por përpiqet ta harroje. Kush ka marre guximin të anashkalojë markën kombëtare “Nënë Tereza”?
Vëreni një krahasim midis aeroportit të Tiranës dhe atij të Beogradit në fotot bashkëngjitur. Ne gjithe ambientet e aeroportit, vetëm për sy e faqe, diku shkruhet me shkronja të vogla në shqip “Nënë Tereza” pas “TIRANA INTERNATIONAL AIRPORT”, me shkronja të mëdha dhe në pjesët më të dukshme kur hyn dhe del në Aeroportin “Nënë Tereza” të Tiranës. Nese miliona turistë në vit, sapo zbarkojnë dhe shohin “TIRANA MOTHER THERESA AIRPORT”, do të ishte një reklamë e paçmueshme për Shqipërinë.
Në sheshin “Nënë Tereza” në qendër të Tiranës nuk ka asnjë statujë të Nënë Terezës, kur duhet të kishte një skulpturë madhështore, ndër më të mëdhate në botë.
Sa fonde ka dhënë shteti shqiptar për veprimtari, botime, simpoziume, studime, filma, muzeume, sponsorizime etj., brenda dhe jashte vendit, në vendlindjen e saj, kudo ku ka shqiptarë, në dobi të njohjes së kësaj shqiptareje të madhe, të kësaj krenarie kombëtare dhe globale, në shërbim të lartësimit të markës kombëtare në botë?
Kjo qasje shtetërore ndaj figurës së Nënë Terezës duket e qëllimshme dhe antikombëtare. Kush po e tradhton kombin në rastin e Nënë Terezës?
PERPARIM GJEKA
15.2.2025
