Basir Çollaku/ Shteti i thellë në Shqipëri, PD të japë ofertën

Ajo që po çbën Donald Trump në USA, me një ekip të ri ambicioz republikan, me një fitore zgjedhore 3D, kongres, senat e Shtëpinë e Bardhë, ku është bashkuar edhe gjeniu Elon Musk, është përmbysja e madhe duke vënë dorë në atë çka e quajnë Shteti i Thellë. Në rrënjët majtisto-soroiste radikale, në zyrat me paratë publike të përdurora për synime ideologjike globale, të strehuar masivisht nëpër institucione, agjenci, shoqata e projekte, në USA dhe nëpër botë, me një agendë të caktuar.
Po në Shqipëri?
Historia është më e gjatë dhe njëherësh me thellësi të hershme. Një shtet brenda shtetit, një shtet i mbivendosur mbi atë publik, shkrirë bashkë me të, një monstër e tillë e zgjatuar në çdo pjesë të jetës në Shqipëri, është përtej çdo të mundshmeje. Nëse ngjajnë si rrjete sekrete potenciale të paautorizuara të pushtetit e veprues në hije, janë qeveritarët realë. Këtu shteti i thellë dhe ai publik, në 12 vite janë shkrirë në një, ndaj kjo lloj organizate nuk e manipulon por kontrollon atë publik. Sepse aty ka segmente jo të pakta nga policia, shërbimet e vjetra pjesë e sigurimit të shtetit, agjenci të administratës dhe burokratë të shumtë zyrash. Ata kanë një agendë ndryshe, duke përmbysur politikat në interes e favor të tyre. Sa ka ndryshuar e si po mbahet e shkuara në pushtet dhe shtet në vendin tonë. Administrata, shërbimet, grupet e politikës dje, nuk janë asgjësuar, as larguar, por riformatuar, duke mos lëshuar terren, por duke e transformuar atë.
Sigurimi i shtetit,
U gjendën me porosi kudo. Në pushtet qendror legjislativ dhe ekzekutiv, pushtet lokal, në drejtësi, kryesisht në prokurori, gjykata, policinë e shtetit. Dje dhe sot, gjen punëtorë, bashkëpunëtorë, hetues, prokurorë, gjyqtarë, persekutorë. Ajo çfarë ka ndodhur është strehimi dhe jo pastrimi. Eshtë e shkuara e pandërprerë e cila vazhdon të diktojë shumë zhvillime edhe sot. Ndonëse pas 35 vitesh drejtësia ka njohur shumë formatime, emërtesa të shumta institucionesh, me pretendimn se po ribëhet, bërthama dominuese mbetet e vjetra. Janë shtuar emra nën shërbimin e organizatës “Soros” duke harmonizuar dakordësinë me ato të para viteve 90-t. Majtizmi ekstrem, ishte aksi bashkues, e hibridizuar me efektet e globalizmit, ku agenda antinjeri dhe antifamilje kulmon egërsisht. Në 12 vitet e fundit u ashpërsua sundimi. I gjen sot edhe në Agjenci të ndryshme. Paratë publike përveç të ardhurave nga fondacioni “Shoqëria e Hapur” me veshje amerikane hidheshin pa kursim në organizata e shoqata për të mbrojtur e thelluar projektin. Nuk ndaluan, për të rritur aksesin dhe vënien në dorë të Medies, kryesisht ekonominë, të cilën e kanë shpërndarë në pak duar, për ta kthyer në bord mbështetës. E kthyen Shqipërinë në një laborator politik, social, ekonomik e elektoral, një kavie si shërbesë për ta eksportuar në vende të tjera ku u duhej. Në këtë genocide ekonomia dhe pasuritë e Shqipërisë u kthyen në ushqim të tavolinave të tyre, duke rritur presionin e boshatisjes njerëzorë të trojeve tona. E djathta duhet të jetë e kthjellët. Duhen premtime për t’i kthyer në vendime reale. Dekomunistizim, desoroizim, hapje dosjesh të persekutorëve, jo të të persekutuarve, rikthim të pasurisë së vjedhur qytetarëve, kthim të pasurive kombëtare në duar të shtetit për të mos vjedhur dhe brezat e tjerë. Kode të forta për familjen dhe gjininë. Ashpërsim ekstrem të ligjeve e ndëshkimeve për grupet e trafikut të kokainës të cilët kanë asgjësuar arsimin, ekonominë, duke demotivuar e rënduar pritshmërinë për rininë sot, Shqipërinë nesër. Kritere e vendime të forta kundër prurjeve pafund të emigrantëve për interesa politike e pushteti, të cilët cënojnë demografinë e vendit, e nesër zhbëjnë popullsinë edhe numerikisht. PD duhet të jetë në krye të këtij ndryshimi. Ta ofrojë dhe kërkojë besimin e mbarë shqiptarëve. Nëse e bën kthimi në shumicë të mbështetjes është përtej parashikimeve. Askush nuk do joshet nga thasët me miell përballë vendimeve të forta për të sotmen e të nesërmen. Pastrimi i shtëpisë nis me pastrimin e partive e të një shteti ndryshe. Në të kundërt, shqiptarët do të jenë emigrantë nëpër botë dhe emigrantët e huaj do të bëhen shqiptarë me prindër partitë politike.