Populli pakësohet, administrata shtohet!?
Nga Xhevat Mustafa
Siç njoftohet nga mediat dhe rrjete sociale më 11 janar 2025, Rama- qeveria ka miratuar ditët e para të vitit 2025 shtimin e ushtrisë së administratës qeverisëse edhe me 1183 nëpunës të tjerë. Kështu, me popullsisnë e mbetur as 2.5 milionë dhe me 250.000 nëpunës në administratë, ka të ngjarë që me 1 nëpunës në administratë për 10 banorë, të jemi të parët apo kampion në botë! Në shumicën e vendeve, shumë më të zhvilluar e me nivele mirëqenie tepër më të lartë, ky raport është minimalisht 1 me 100 dhe mesatarisht 1 me 200 e më lart…!
Nuk mund të mos çohet ndërmend se ky shtim është paradoksal, kontradiktor, i palogjikshëm, i panevojshëm, i pajustifikueshëm apo edhe më rëndë, çmenduri, për të paktën dy arsye! Së pari, edhe sipas censusit të vitit 2023, rezultatet e të cilit u shpallën 9 muaj më vonë, popullsia e Shqipërisë, gjatë 10 viteve të fundit, është zvogëluar me rreth 1 milionë banorë!?
Së dyti, Rama e ka bërë gjoksin gropë dhe fytin me kallo duke u mburrur me zgjerimin dhe masivizimin e shërbimeve online, të kompjuterizimit, sidomos në institucionet qeveritare, në administratë…!
Në të kundërt, nëse do të mendohet për t’i kursyer sa më shumë buxhetit të shtetit e për rritjen e ndjeshme të pagave e të pensioneve si dhe të nivelit të mirëqenies së rreth 1 milion banorëve që jetojnë në kushtet e varfërisë, veprimi më i logjikshëm e më i pranueshëm do të ishte ulja e shifrës së administratës të paktën në nivelin e vitit 2013, pra në rreth 85- 95000 vetë…!
Mbetet të mendohet apo të përforcohet bindja se kjo “brigadë” e re me administrativistë i duhet Rama- qeverisë për zgjedhjet e 11 majit 2025 e për “fitoren” e mandatit të katërt ose të gjëmës së katërt për shumicën e shqiptarëve, për Shqipëri dhe Komb.
Llogaria është e lehtë: këta rreth 1200 nëpunës të rinj, shtuar për interesa të pista elektorale, do t’i japin Ramës me shoqe e shokë të paktën 3600- 5000 vota!? Secili prej tyre do të jetë i detyruar “të dhurojë” për “SHEFIN dhe SHEFEN zemërgjërë” rreth 3-4 vota familjare, përfshirë edhe familjet e krushqive të dhëndrit apo nuses së punësuar në administratë!?
Pra, skandalet, abuzimet, masakrat apo çmenduritë buxhetore me firmat e Edi Ramës, nën hundën e SPAK- ut, nuk kanë shterim apo fund, si ujët e Lanës…, si kullat me themele mbi miliona të pistë e të përgjakur, si “bananet” e Ekuadorit…, si plehrat që mbushin fusha dhe furra të inceneratorëve, në funksionim apo si projekte nëpër dosje…!
