Duket se reshjet e ditëve të fundit po rrezikojnë një segment të rëndësishëm të Rrugës së Arbërit.
Është deputeti i qarkut Dibër, Xhelal Mziu që ngre shqetësimin për rrezikun që i kanoset arteries kryesore që lidh Dibë, Bulqizë e Mat me kryeqytetin e vendit.
Reagimi i plotë i deputetit demokrat:
Rruga e Arbërit në rrezik shembje në gjithë gjatësinë e trasesë në Zallin Murrizes.
Reshjet e shiut e dëborës këto 2-3 ditë i kanë shtuar prurjet në Zallin e Murrizes, përgjatë së cilit kalon një pjesë e rrugës së Arbërit.
Ka nisur të dëmtohet traseja e rrugës e cila është shembur deri pranë asfaltit.
Shkak për këtë, është mosndërtimi i argjinaturave mbrojtëse nga ndërtuesi i rrugës, pasi prurjet në këtë zall shtohen ndjeshëm.
Terreni në të cilin është ndërtuar rruga është vendosur në bazament me formacion të butë, duke e bërë atë më pak rezistente nga vërshimi i ujit të shiut që nis që nga Qafa e Murrizit.
Në të gjithë segmentin e Xibrit të rrugës së Arbërit, nga tuneli i Murrizit e deri tek tunelet në fshatin Shkallë, nuk është ndërtuar argjinaturë mbrojtëse nga vërshimi i ujërave të zallit të Murrizes, ç’ka vë në rrezik qëndrueshmërinë e saj.
