Mbas publikimit të lajmit se qindra banorë të Dibrës janë helmuar nga uji i pijshëm, ka reaguar deputeti demokrat i Qarkut, Xhelal Mziu.
Reagimi i plotë i tij në rrjetet sociale:
Ujësjellësi i Sopanikes në Bashkinë Dibër i kontaminuar, qindra banorë të helmuar!
Të gjitha strukturat shtetërore e mbajtën të fshehtë këtë ngjarje të rëndë prej më shumë se dy ditësh.
Prej 2 ditësh urgjenca e spitalit të Peshkopisë po përballet me flukse të mëdha njerëzish: burra, gra, fëmijë, të cilët kanë shfaqur simptoma të helmimit. E gjitha kjo dyshohet se ka ardhur si pasojë e kontaminimit të ujit të pijshëm.
Ujësjellësi i Sopanikës furnizon me ujë dhjetëra fshatra të 4 Njësive Administrative (Arras, Fushe-Çidhen, Kastriot, Tomin) të bashkisë Dibër.
Ndërkohë nga ana e autoriteteve përkatëse nuk është marrë asnjë masë, madje ata janë treguar të kujdesshëm që ta mbajnë të fshehur këtë rast.
U bëj thirrje autoriteteve qe marrin masa të menjëhershme për përmirësimin e situatës.
Ju uroj shërim të shpejtë të sëmurëve dhe shpresoj që raste të tilla të mos përsëriten.
