Nga Xhevat MUSTAFA
Lidhur me personazhin kryesor të kësaj farse juridiko- politike shqiptaro- greke, nuk është e vështirë të kuptohet se Fredi Beleri u arrestua më 14 maj 2023 dhe mbahet në burg se “ashtu është loja” me nga dy porta, në tokë e në detë…! Apo, për ta shfrytëzuar të dy palët si një “mëz” në tokë për të larguar vështrimin dhe vëmendjen nga “kali i Trojës” në detë!? Kështu, Edi Rama fiton ca pikë si “patriot i madh shqiptar” dhe “antigrek i tërbuar apo i çmendur” me një “çështje individuale dhe minore” dhe “mbulohet me gjethe fiku e vërteta në thellësi të detit Jon” për një çështje shumë madhore…! Për këtë dyshim apo mendim ndihmon edhe logjika e thjeshtë! Le ta pranojmë për të vërtetë se Fredi Bejleri “ka blerë” në Himarë nja 10, 20, 50, 100…vota! Por, është parë e kuptuar se po atë ditë, më 14 maj 2023 e rreth 445 ditë më vonë, më 4 gusht 2024, shtabet elektorale të kandidatëve rilindas dhe patronazhistët kanë blerë dhe “vjedhur allasocialistçe” me dhjetëra mijëra vota anë e mbanë Shqipërisë e me qindra anë e kënd Himarës, sipas një vesi dhe zakoni të vjetër…dhe pa u hyrë gjemb në duar e këmbë…! Pas zgjedhjeve për Parlamentin Evropian në javën e parë të qershorit 2024, Fredi Beleri, i mbështetur hapur e juridikisht nga Partia “Demokracia e Re” dhe kryeministri Kyriakos Mitsotakis si dhe indirekt nga kryeministri i Shqipërisë Edi Rama, si urdhërdhënës për arrestimin dhe mbajtjen në burg të tij e nga PD e opozita, që “ia harruan” të shkuarën dhe viktimat, siguroi një vend në parlamentin evropian! Rreth dy muaj më vonë, më 4 gusht 2024, Beleri humbi karrigen e kryebashkiakut në Himarë, që Edi Rama “ia fali” grekut Vangjel Tavo, nënkuptueshëm jo krejt gratis e pa u ndjerë borxhli e mirënjohës ndaj tij…!? Në këto kushte, mund të thuhet se as mendja e Odiseut nuk do ta sajonte dhe inskenonte kaq hollë e trashë këtë skenar me “kuaj helenë Troje”, veshur me brekë, kanotiere, këmisha, kostume, këpucë..firmato…”!?
